Nsangaji ya mu Mwingilo wa Kitatyi Kyonso
1 Shi ukidi nkasampe, bine kubulwangapo kulanga mukekadila būmi bobe mu myaka ya kumeso. Nkindi 21:5 witulombola amba “mifwatakanyo ya muntu mupyasakane itwala enka ku [byabuyabuya].” I amo, kulanguluka byabinebine pa bitungo byowitungile mu būmi kukakuletela byabuyabuya. O mwanda shi kokwata mpangiko ya bya kukalonga mu mafuku a kumeso, langa ne kwingila mwingilo wa kitatyi kyonso. Mwanda waka?
2 Ipangula batame bamobamo baingile mwingilo wa bupania mu bunkasampe bakulombole mobeumwenine, bine umo ne umo kakabulwepo kukulombola’mba: “Yoya yo yādi myaka milumbuluke mu būmi bwami!” Tutu umo wāmwenine nsangaji mu mwingilo wa kitatyi kyonso tamba pa busongwalume bwandi unena ku bununu bwandi amba: “I kya nsangaji mpata pa kuvuluka myaka ya kunyuma ya busongwalume, ne kunena amba bine nālondele madingi a tunangu anena’mba: ‘Vuluka Umpangi obe mu mafuku obe pokidi nkasampe.’” (Mus. 12:1) Kino kilomba kwalwila’ko kukwata mpangiko miyampe tamba pano, kukwata’yo abe’wa mwine ne na bambutwile bobe mwa kutompela ku ino nsangaji mu bunkasampe bobe.
3 Bambutwile, Kankamikai Bana Bengile Mwingilo wa Kitatyi Kyonso: Yehova i Shabana wa kilelo, ukulombolanga dishinda dine dya kunanga’mo. (Is. 30:21) Uletanga buno bwendeji bwa buswe mwanda wa kwimupa kifwa kiyampe kya kulonda banwe bambutwile bene Kidishitu. Pa kyaba kya kuleka benu bana betongela abo bene dishinda dyobamona bu dilumbuluke, mwibafundijei na tunangu bayuke dishinda dyobafwaninwe kulonda mwa kweselwa’bo madyese na Yehova. Penepa shi abatama, bufundiji bwenu bukebakwasha bayuke “mwa kushiyañenya kiyampe ne kibi.” (Bah. 5:14, MB) Batame bayukile kala amba kebabwanyapo kukulupila milangwe ya abo bene; ino bafwaninwe kukulupila mudi Yehova wa kolola tushinda twabo. (Nk. 3:5, 6) Bankasampe bo bene, mwanda kebapotolwelepo myanda mivule mu būmi.
4 Bambutwile, shi benu bana kebalumba ku myaka ya busongwanzele, nansha kumeso kwa ino myaka, mwisambei nabo na kusumininwa bayuke bitungo byabo mu mingilo yobakengila. Badingidi ba ku masomo, badimu, ne bobafunda nabo bakebapakika milangwe ya kwitungila bitungo bya ino ntanda, bya kulondalonda byabupeta. Kwashai benu bana batonge masomo akokeja kwibapa bufundiji bwa kamweno umbūmi, bwibapa muswelo wa kwisasaketa ku ngitu ino kwilwa tumweno twa Bulopwe mpika. (1 Tem. 6:6-11) Pavule, kilomba’tu kufunda masomo a sekondele ne busendwe kampanda mwa kwisasaketa biyampe umbūmi koku wingila mwingilo wa bu pania walonso.
5 Kankamikai bankasampe batamije kyabuntu kya bukunga. Nansha shi mwenda mafuku abatyibe mbila ya kusonga nansha kusongwa, bakekala na bwino bufwaninwe bwa kusela biselwa bilēma bya mu busongi. (Tala musāngo 19 pa dyani dya ntentekelo dya mu Mwingilo Wetu wa Bulopwe wa Kweji 6, 2001, dinena amba “Lelo Nobe Ubulwe’po Kwitaba ku Lwito?”) Mwisambilei biyampe pa mwingilo wa bupania, pa kwingidila kokwa kusakilwa bengidi bavule, pa mwingilo wa ku Betele, ne pa mwingilo wa bumishonele, nabya mukakuna mu bankasampe mutyima wa kusaka kwingidija būmi bwabo mu muswelo usangaja Yehova, umwena’mo bakwabo, ne wibaletela abo bene nsangaji.
6 Bankasampe, Tūlai Mwingilo wa Kitatyi Kyonso pa Kifuko Kibajinji: Bankasampe, kemwakikalai na mifwatakanyo ingi pa mwingilo wa bupania. Tompai’o mu bula bwa kitatyi kampanda na kwingila bidi bu bapania bakwashi ponso pomumona mukenga, kitatyi kyomufunda nansha mu makonje. Bine mukemwena banwe bene mutobelanga mwingilo wa bupania! Mubulwe’po kukwata’ko mpangiko ya kwingila bu bapania bakwashi ku meso kwa makonje otusa kushilula kufula’o?
7 Shi wi tutu nkasampe mu bulongolodi bwa Yehova, languluka byabinebine pa muswelo wa kubwanya bisakibwa bya kwikala mwingidi wa mingilo. (1 Tem. 3:8-10, 12) Kadi tala shi ukokeja kwenda ku Betele nansha kukafunda Masomo a Bufundiji bwa Mwingilo shi ubabwanya myaka inenwe. Bwino bokatambula mu mwingilo wa bupania bukakufundija bufundiji bwa kamweno, kifwa mwa kulondela mpangiko yokwete, mwa kulumbulwila kwiteakanya kobe, mwa kwikadila na bakwenu biyampe, ne mwa kutamijija milangwe ya kusela biselwa. Bino byonso bikakuteakanya mwa kupelwa madyese makatampe mwenda mafuku.
8 Kintu kikatampe kya kukukwasha ubwanye mwingilo wa kitatyi kyonso i kwikala na bukankamane mu mingilo ya kiteokratike. Mutumibwa Polo wākankamikile ino ngikadilo, wātela ne byabuyabuya bimwenwa’mo amba: “Umbyonso byo mulonga, mwikale kwibīngila ne mutyima onso monka, pamo bwa kudi Mfumwetu, . . . pa kuyūka’mba i konka kudi Mfumwetu ko mukatambula mpalo” ifwaninwe. (Kol. 3:23, 24) Tulomba Yehova emwesele na kwimuvudijija nsangaji mu mwingilo wa kitatyi kyonso!