Lelo Nobe Ukwashanga ku Kutūla Lapolo Wabinebine?
1 Nsekununi mivule ya mu Bible idi na bibalwa bipotoloke, bilombola patōka mwālongekele bintu bisekunwinwe’bya. Kifwa, Ngideoni wāshindile kitūlo kya bene Midyana na bantu’tu 300. (Bat. 7:7) Mwikeulu wa Yehova wāipaile bashidika 185 000 bene Ashidia. (2 Bal. 19:35) Mu dya Pentekosa 33 K.K., kwābatyijibwe kubwipi kwa bantu 3 000, kupwa kwa kitatyi kityetye, kibalwa kya betabije kyēlundila’ko ke 5 000. (Bil. 2:41; 4:4) Mungya mulombwela ino nsekununi, i kimweke patōka amba bengidi ba Leza ba pa kala bādi balonga buninge bwa kutana kibalwa kibwane kadi kyabinebine.
2 Ne bulongolodi bwa Yehova nabo dyalelo bwitulombolanga kutūla lapolo wa mingilo ya budimi kweji ne kweji. Kulonda na kikōkeji ino mpangiko kupēlejanga butadi buyampe bwa mingilo ya busapudi. Malapolo akokeja kwitusokwela amba kudi kintu kampanda kya mu mwingilo kisakilwa kutebwa’ko mutyima nansha amba kukisakilwa bengidi bavulevule mu kipindi kansangwa kya budimi. Mu kipwilo, malapolo a mingilo ya budimi akwashanga bakulumpe ku kuyuka boba bakokeja kutandabwila’ko mwingilo wabo ne kuyuka boba basakilwa bukwashi. Kadi malapolo alombola kwendelela kumeso kwa busapudi bwa Bulopwe akankamikanga kisaka kituntulu kya bana na bana bene Kidishitu. Le nobe uloñanga’mo kyobe kipindi mwanda wa kukwasha ku kutūla lapolo wabinebine?
3 Kiselwa Kyobe: Lelo ku mfulo kwa kweji ukomenwanga kuvuluka byolongele mu mwingilo? Shi ukomenwanga, mwene i biyampe kulemba lapolo obe kitatyi ne kitatyi kyotambila mu mingilo ya budimi? Bamo balembanga pa kalandadiye nansha mu kalane. Bakwabo basela fomu wa lapolo wa mingilo ya budimi wa kukalemba’po. Ku mfulo kwa kweji, tūla ponka na ponka lapolo kudi mutadi wa kifundwa kyenu kya kitabo. Shi kadi usakile, ukokeja kutūla lapolo obe mu kasanduku ka malapolo kadi ku Njibo ya Bulopwe. Shi ubailwa’ko kutūla lapolo obe, enda abe mwine ukamone ponka na ponka mutadi wa kifundwa kyenu kya kitabo kupita’ko kumwilaija āye bidi akulandule’yo. Kutūla lapolo pakubulwa nsengwa kulombola amba ulēmekele mpangiko ya Yehova ne amba udi na kabango ka buswe ku batutu bapēlwe mwingilo wa kungwija ne kudinga malapolo.—Luka 16:10.
4 Mwingilo wa Mutadi wa Kifundwa kya Kitabo: Mutadi wa kifundwa kya kitabo i mutadi wa mukumbukumbu kadi wa kilelo, utele mutyima ku mingilo ya kisumpi mu bula bwa kweji yense. (Nk. 27:23) I muyuke shi musapudi ne musapudi usapulanga kitatyi ne kitatyi, bininge, ne na nsangaji, kadi i wa kampeja-bukidi ka kukwashisha bakwabo shi kubaikala umo katambilepo mu mwingilo mu kweji yense mutuntulu. Pavule, kikatampe kine kimusakilwa i binenwa’tu bya kumukankamika, madingi mashikate, nansha kumwita amutwale mu mingilo ya budimi.
5 Ku mfulo kwa kweji, mutadi wa kifundwa kya kitabo ukatadija shi bonso ba mu kisumpi ke bavuije kiselwa kyabo kya kutūla lapolo wa mingilo mwa kupēla mulembi kyaba kya kutuma lapolo wabinebine wa kipwilo ku bilo bya musambo kumeso kwa difuku dya busamba dya kweji ulonda’po. Shi kweji kaenda ulumba ku mfulo, aye ufwaninwe kuvuluja kisumpi ne kuleta mafomu a lapolo ku kifuko kufundilwanga kifundwa kya kitabo. Shi kudi bamo belwanga kutūla malapolo a mingilo yabo, aye ukokeja kwibavuluja mobifwaninwe ne kwibakankamika.
6 Kutūla malapolo etu a mingilo ya budimi ponka na ponka kupēlejanga mwingilo wa kutuma lapolo ulombola byabinebine mingilo ingilwe mu budimi. Lelo ukalonga’mo kyobe kipindi kya kutūla ponka na ponka lapolo obe wa mingilo kweji ne kweji?