Malondololo Ku Bipangujo Byenu

◼ Mwanda waka tufwaninwe kutūla lapolo wa mwingilo kweji ne kweji pakubulwa kwija?

Tusangalanga batwe bonso potwivwananga lapolo mulumbuluke wa byotwaingile mu busapudi bwa musapu wa Bulopwe. (Tala Nkindi 25:25.) Bilongwa 2:41 uleta lapolo wa mu difuku dya Pentekosa, pa kupwa kwa kishinte kya kyanga kya Petelo, amba “balundwako mu dyonka dyadyo difuku bantu bafika ne ku bu-tununu tusatu.” Mafuku pa kupita’po, kino kibalwa kyāfika “ne ku butununu tutano.” (Bil. 4:⁠4) Bine kino kyāsangeje bakristu ba mu myaka katwa imbajinji pobekivwene! Ne dyalelo twivwananga muswelo umo onka potutambulanga malapolo akankamika. Tutelekanga nsangaji mikatampe pa kwivwana malapolo malumbuluke aleta banabetu kujokoloka ntanda yonso mu busapudi bwa myanda miyampe.

Kilombanga kitatyi ne bukomo pa kusambakanya bibalwa bya ano malapolo onso, omwanda kwingidila pamo na musapudi yense wa Bulopwe i kwa kamweno. Lelo tuyukile mvubu ya kutūla lapolo wetu wa kweji ne kweji pakubulwa kwija?

Kwilundilako kwitulombolwanga kwituletelanga nsangaji bininge. Kadi monka, malapolo akwashanga Sosiete ayuke mwendela mwingilo kumeso kujokoloka ntanda yonso. Ne mwa kutyibila mbila itala myaba isakilwa bukwashi, pa butongi bwa mabuku afwaninwe kulupulwa ne pa bungi bwao. Mu kipwilo ne kipwilo, bakulumpe babandaulanga malapolo a mingilo mwanda wa kuyuka i mu myanda’ka mufwaninwe kulongwa bilumbuluke. Malapolo mayampe etukankamikanga ne kutonona umo ne umo umbukata mwetu abandaule mwingilo wandi ne kumona i mu bika mwafwaninwe kwendelela.

Musapudi yense ufwaninwe kuyuka kiselwa kyandi kya kutūla bukidi-bukidi lapolo wandi wa mingilo kweji ne kweji. Bendeji ba bifundwa bya bitabo ye abo bakokeja kuvuluja basapudi kino kiselwa kyabo, mwanda bekankilanga kukwasha umo ne umo wa mu boba bakolelwanga kusapula kweji ne kweji. Bakokeja kwibavuluja ku kifundwa kya kitabo kya kumfulo kwa kweji, nansha mu kitatyi kikwabo kifwaninwe. Shi kekibwanikapo kutūla malapolo a mwingilo ku Njibo ya Bulopwe, nankyo mwendeji wa kifundwa kya kitabo ukakonga’o ne kuta mutyima ku kupa’o mulembi kumeso kwa kitatyi, mwanda wa nandi amone mwa kudingila lapolo wa kipwilo wa kumfulo kwa kweji wa kutuma ku Sosiete.

Kutūla lapolo wetu wa mwingilo pa kitatyi, na kikōkeji ne pakubulwa kwija, kupēlejanga mwingilo wa boba bapelwe kiselwa kya kukwatakanya būmi bwetu bwa kumushipiditu.