Lelo Wi Musapudi wa Bulopwe wa Kitatyi Kyonso?
1 Batwe bonso twasepelele mpata potwaivwene amba Congo-Kinshasa wafikile pa kibalwa kikande kya basapudi 114 071 mu Kweji 9, 1999. Bine buno i bukomo bukatampe bwalongelwe mwa kimo! Ino kyamwekele amba mu myeji yalondele’po, bamo mu bano basapudi baikele na makambakano a kwikala basapudi ba Bulopwe ba kitatyi kyonso, mwanda buvule bwatūkile kufika pa basapudi 105 600. Kino kilombola’mba musapudi 1 pa basapudi 13 kakwetepo mpangiko ya kutambila mu mwingilo kweji ne kweji. Tukulupile amba kukankamikwa kwitukankamikilwe kunshi’ku kusa kupwija uno mwanda.
2 Kwatai Ano Madyese na Makasa Abidi: Ano madyese otudi nao a kusapwila bantu netu myanda miyampe ya Bulopwe i madyese otufwaninwe kukwata nkwatyidile. Mwanda uno mwingilo utōkejanga Yehova pa mutyima, kadi o muswelo wa kukwasha bantu ba mityima myoloke nabo bayuke dishinda ditwala ku būmi. (Nk. 27:11; 1 Tem. 4:16) Kusapula kitatyi kyonso kwitupanga bwino buvule mu mwingilo, kwituyuja nsangaji ne kuloelelwa mu mityima yetu.
3 Tūlai Lapolo wa Mingilo: Banabetu bamo batambilanga mu mwingilo, ino bekala na kinkosela kya kutūdila lapolo wabo wa mingilo. Ketwakilangai nansha dimo amba byotwingile i bityetye, bidi bumvu ne pa kutūla lapolo. (Dingakanya na Mako 12:41-44.) Na bubine, byotwingile byo byonka byotutūla! Shi ku njibo tudi’ko na kibidiji kiyampe kya kulemba, kifwa pa kalandadiye kitatyi kyotupityija mu mwingilo, tukavuluka nyeke kutūla bukidibukidi lapolo wabine ku mfulo kwa kweji ne kweji.
4 Kwashai Basakilwa Bukwashi: Mukokeja kulumbulula mpangiko ya kukwasha boba basakilwa bukwashi bwa kutambila nyeke mu mwingilo. Mulembi wa pa kipwilo ne bendeji ba bifundwa bya kitabo bafwaninwe kukwata mpangiko mwanda wa basapudi bapotolwele’byo bakwashe’ko bakwabo. Shi udi na bana nansha befundi ba Bible bakidi basapudi bakubulwa kubatyijibwa, wibafundije kutūla lapolo wabo wa mingilo kweji ne kweji.
5 Vuluka lusango lunena’mba “Wafwija’ko Pangala pa Kulāla Myaka Mivule ya Būmi Bwandi mu Mwingilo wa Yehova,” mu Kiteba kya Mulami kya difuku 1 Kweji 10, 1997, mu Falanse. Kaka Ottilie Mydland mwine Norveje wāikele musapudi wa myanda miyampe wa kitatyi kyonso kumeso kwa kubatyijibwa’ye mu 1921. Myaka 76 pa kupita’po, papo kadi na myaka 99, wavuluka’mba: “Ndi na nsangaji mpata, mwanda nakibwanya ne pano kwikala musapudi wa kitatyi kyonso.” Bine, ino i milangwe ya kutendelwa ifwaninwe kwiula bengidi ba Yehova bonso.