Lelo Kweji wa Kitema Ukashala Uvulukwa?

¹ Mwaka wa 1963 i mwaka ushele uvulukwa na bantu ba Yehova. Uyukile i mwanda waka? Mwanda o mwaka wābwene kibalwa kya basapudi mudiyo umo kujokoloka ntanda yonso. Shi wādi kala mu bubinebine mu kine kitatyi’kya, ye uno ubavuluka nsangaji yotwāikele nayo pa kumona basapudi bavule basapula musapu wa Bulopwe! Kifwa dyalelo, mu matanda abundile wetu mwaba, mudi ntanda imo idi kasuku kayo na basapudi 108 000 ne kupita. Ino mu bano bonso, mudi kintu kya basapudi 10 374, kweji ne kweji, kebakiletangapo lapolo wa mwingilo wabo wa busapudi.

² Tunekenyei Kikoleja: Mu Kweji 9, shi umo ne umo umbukata mwetu atūle lapolo, tubwanya kufikila pa kibalwa kikatampe kya basapudi mu mwaba wetu. Bine, uno kweji ukashala uvulukwa shi tulonge bukomo bwa kufikila’po! Tukokeja kwikibwanya shi batwe bonso tulunge’ko kuboko.

³ Boba batengele kwenda konje bakokeja kupityija kitatyi kampanda mu mwingilo kumeso kwa kwenda. Shi koenda paika matrakte, mikanda, ne mapepala mwa kukapānina bukamoni ku bantu boketana nabo mu lwendo. Kadi, pa kufika koenda ubwanya kutambila mu mwingilo na basapudi ba mu kibundi moendele.

⁴ Nansha shi ngikadilo yodi’mo ikulomba kushikata kijabanda, inoko ukokeja kwingila’ko mwingilo. Ubwanya kupāna bukamoni ku badokitele, bamuñanga, nansha ku bapempudi. Ukokeja kupāna bukamoni na kulemba mikanda nansha ku telefone.

⁵ I bine, bamo bakasakilwa bukwashi bwetu kumeso kwa kutambila’bo mu mwingilo wa budimi mu Kweji 9. Bakulumpe, bengidi ba mingilo, ne bendeji ba Kifundwa kya Kitabo bafwaninwe kukwata mpangiko ya kwibakwasha. Nakampata, kokivulaminwa kutūla bukidi bonka obe lapolo wa mwingilo mwanda wa ukabalwe bu musapudi mu Kweji 9.

⁶ Tusangelei Ano Madyese: Mwingilo i ‘kilobekwa kilumbuluke kīne.’ (2 Tem. 1:14) Tusangelanga madyese otupelwe a kusapula myanda miyampe. (1 Tes. 2:⁠4) Shi tubandaule bintu byonso bitulongela Yehova, mutyima wetu keubulwepo kwitutonona kutambila nyeke mu uno mwingilo wa mvubu mikatampe mu bula bwa mwaka onso mutuntulu. Kekwakekala kintu nansha kimo kya kwitubudija kusapula kitatyi ne kitatyi. Twielelei’ko, uno Kweji 9 ekale kweji ukashala uvulukwa mu mwingilo wa Yehova, kadi tukwatei mpangiko ya kupāna bukamoni butala padi Yehova kweji ne kweji!​—⁠Mit. 34:⁠1.