Kweji 8 Ukekala Kweji wa Kasekuseku mu Mwingilo!

1. Byotwafwena ku mwaka wa 100 wa Bulopwe bwa Leza, le i kampanye’ka ka pa bula kasa kulongwa ntanda yonso?

¹ Mwaka wa 100 wa kubutulwa kwa Bulopwe bwa Leza ubafwena. Bine, i kyendele’mo mpata kotudi, tutendele Yehova na kulonga kampanye ka pa bula! Mu Kweji 8 tukabanya ntanda yonso trakte mupya udi na mutwe wa mwanda unena’mba, I Kwepi Kotukatana Malondololo ku Bipangujo bya Mvubu mu Būmi? Uno trakte ukankamika batangi batane malondololo mu Bible ne kushintulula muswelo ubwanya kwibakwasha diteba dya jw.org.

2. Le i muswelo’ka otukalunga kuboko ku kwelwa kwa ‘lubila lukatampe kudi Yehova’ mu Kweji 8?

² Lubila Lukatampe lwa Mitendelo: Pa kusaka kukwasha basapudi batandabule mwingilo wabo, i kuteakanibwe mpangiko ya pa bula ikakwasha muntu ense usaka kwingila bupania mukwashi mu Kweji 8. Mu uno kweji, basapudi i bapebwe mukenga wa kwingila bupania mukwashi bwa mansá 30. Kweji wa 8 byadi na ma Dya Butano, ma Dya Mposo ne ma Dya Yenga atano, ukakwasha basapudi bavule babatyijibwe bengila twaji twa ntanda, ne benda ku masomo mu bula bwa yenga babwanye kwingila bupania mukwashi. Shi udi na kifundwa kya Bible kyendelela biyampe nansha mwana ukimba kwikala musapudi, nankyo wisambe na mukwatakani wa kitango kya bakulumpe pampikwa kulejaleja. Bine, kino kikakankamika’po kashā bano bapya bakelunga netu bu basapudi mu uno kweji wa kasekuseku! Nansha bapania ba lonso bavule byobakōkolokwanga mu Kweji wa 8 pa kupwa kubwanya mansá ebalombelwe mwaka ne mwaka, kikekala kiyampe kobadi kujadika mpangiko yabo mwanda wa kusapula bininge mu kano kampanye ka pa bula. Kino kyo kitatyi kifwaninwe bisaka kwisambila pamo, mwanda wa kumona muswelo obibwanya kulunga kuboko ku kwela ‘lubila lukatampe lwa mitendelo kudi Yehova,’ lwine lukelwa mu Kweji 8.—Eza. 3:11; Nki. 15:22.

3. Lelo i kikulupiji’ka kyotudi nakyo pa kano kampanye ka pa bula?

³ Nansha byoketudi balonge makampanye mu mafuku kunyuma eifwene na kano, inoko tukulupile amba kano kampanye kakekala ka kasekuseku. Le tubulwepo kutambula kibalwa kipya kikande kya mansá, kya basapudi, ne kya bapania bakwashi mu Kweji 8? Byoketuvuya mwaka wa mingilo wa 2014, tulomba Yehova esele bukomo bwa bantu bandi bulongwa ntanda yonso mwanda wa Kweji 8 ekale kweji wa kusapula bininge bukamoni!—Mat. 24:14.