Bukwashi bwa pa Kitatyi Kifwaninwe
1 Mutumibwa Petelo wāmwene amba banababo betabije basakilwa kukankamikwa, wātengwa ku mutyima, penepo wēbavuluja bivulujo bya buswe, bibakankamika. (2 Pet. 1:12, 13; 3:1) Wāsoñanya ‘boba bādi na lwitabijo’ amba bendelele na kutama mu ngikadilo ya ku mushipiditu kutyina amba bakekala “pampikwa mingilo nansya pampikwa kipa kya buyuki bwa Mfumwetu” Yesu Kidishitu. (2 Pet. 1:1, 5-8, BB) Kyādi kisaka Petelo pano i kwibakwasha baningishe senene lwito lwabo ne kutongwa kobātongelwe na Yehova, mwa kutaninwa’bo “talala, nyā, bakubulwa kiko, nansha kakoba kēne kakutopeka mu meso andi.” (2 Pet. 1:10, 11; 3:14) Ku bavule, kukankamika kwāebakankamikile bwādi bine bukwashi bwa pa kitatyi kifwaninwe.
2 Ne batadi bene Kidishitu dyalelo nabo mo monka, batanga bantu ba Leza mutyima. Mu “ino myaka ya malwa,” bengidi bavule ba Yehova kebabudilwepo kwikonda na bikoleja. (2 Tem. 3:1) Makambakano keadi mpwilo a bufudile bwa lupeto, a mu bisaka, ne atala muntu ne muntu akokeja kufikija bamo ku kwiivwana mwēivwanine Davida kanena’mba: “Bibibibi byampikwa kubalwa bibangela umbukata, bubi bwami bubampeta, ino nkikimwene mwakubandwila mpala; bitabukile kuvula ne nywene ya ku mutwe, kadi ne mutyima wami nao ubankonyama.” (Mit. 40:12) Ino mitabakano ibwanya kulēmenena bano banabetu uyuka bashilula kusūla myanda ya ku mushipiditu ya mvubu mikatampe ne kuleka kutambila na bupyasakane mu mwingilo wa bwine Kidishitu. Ino, nansha byobatanwa na bino bikoleja, ‘kebavulaminwepo misoñanya ya Yehova.’ (Mit. 119:176) Kino kyo kitatyi kifwaninwe bakulumpe kupa banabetu ba uno muswelo bukwashi bwibasakilwa.—Is. 32:1, 2.
3 Pa kuvuija kino kisakibwa, bakulumpe i bakankamikwe kulonga bukomo bwa pa bula bwa kukwasha boba kebakitambilangapo mu mwingilo wa busapudi. Bukomo bukatampe bwa kwibakwasha bukilongwa’nka kulongwa kadi bukendelela ne mu Kweji wa Busatu yense. Batadi ba Kifundwa kya Kitabo i banenwe kupempula boba kebakisapulanga mwa kwibakwashisha nabo bashilule dipya kwingila mingilo pamo na kipwilo. Kukokeja kukwatwa mpangiko ya kushilula kwifunda nabo kifundwa kya Bible shi i kyendele’mo. Basapudi bakwabo bakokeja nabo kwitwa kwela’ko kuboko. Shi abakunena kwela’ko kuboko, yuka amba bukomo bosa kulonga budi na kamweno mpata, kupityidila shi upāna kukankamika na kanye ne kwivwanija.
4 Batwe bonso tufwaninwe kusangala shi mwanetu kampanda washilula dipya kwingila mingilo pamo na kipwilo. (Luka 15:6) Bukomo botulonga bwa kukankamika boba kebakisapulanga bukokeja binebine kwikala bu ‘kinenwa kinenwa pa kitatyi kifwaninwe.’—Nk. 25:11.