Mwingilo Utūkija Mutyima
1 Musapu wa Bible utūkijanga mutyima bonso betabija’o ne kwingidija’o mu būmi bwabo. (Mit. 19:7, 8) Wibakwashanga benyongolole ku bufundiji bwa bubela ne ku bilongwa bibi, kadi upānanga kikulupiji kya binebine kya būmi bwa kumeso. Inoko, ke’nkapo boba batambula myanda miyampe bamwena’mo kete. Ne boba basapula bubinebine bwa Bible bene nabo batūkijibwanga mutyima.—Nk. 11:25.
2 Bakomejibwe na Mwingilo: Yesu wānene amba boba betabija kusela lupungu lwa bu mwanā bwanga bwa bwine Kidishitu, lutala ne pa mwingilo wa kusapula ne kulonga bana ba bwanga, “[ba]kamonanga mityima mitūke biyampe.” (Mat. 11:29) Aye mwine wamwēne kusapwila bakwabo bu kintu kileta bukomo. Kwadi byādi pamo’nka bu bidibwa. (Yoa. 4:34) Paātumine bana ba bwanga 70 kukasapula, bāsangele pa kumona mwādi mwibakwatakenya Yehova pa bukomo bobādi balonga.—Luka 10:17.
3 Bene Kidishitu bavule dyalelo nabo bakomejibwanga muswelo umo onka pobatambila mu mwingilo wa busapudi. Kaka umo wānene’mba: “Mwingilo untūkijanga mutyima mwanda umpanga bwendeji ne kitungo mu būmi bwami. Mvulaminwanga’ko myanda yami ne mitabakano ya bukile bukya kitatyi kyondi mu mwingilo.” Kaka mukwabo, mwingidi mupyasakane, wānene’mba: “Uno mwingilo . . . umvulujanga dyuba ne dyuba’mba Yehova udi’ko bine kadi umpanga ndoe ne nsangaji ya mu mutyima keibwanyapo kuletwa na kintu kikwabo.” Bine, i madyese kotudi pa kwikala “bakwingila mīngilo pamo na Leza”!—1 Kod. 3:9.
4 Lupungu lwa Kidishitu I Lupēla: Yesu ketulombangapo kulonga byobya byoketubwanyapo, nansha bene Kidishitu byo banenwe “kwikankamika.” (Luka 13:24) Na bubine, witwita na buswe ‘tutwele mu lupungu lwandi.’ (Mat. 11:29) Boba bekonda na ngikadilo mikomo babwanya kukulupila’mba mwingilo obengila na muya wabo onso usangajanga Leza, nansha shi i mutyetye.—Mako 14:6-8; Kol. 3:23.
5 Bine, kwingidila Leza utendelanga byonso byotulonga pa mwanda wa dijina dyandi i kintu kitūkija’po mutyima kashā! (Bah. 6:10) Nanshi twikankilei’ko nyeke kumupa byobya bilumbuluke.