Bankasampe—Mwishimikilei Kyalwilo Kilumbuluke kya Būmi bwa Kumeso
1. I kika kinenenwa’mba bankasampe bene Kidishitu bafwaninwe kutamija lwitabijo lukomo?
1 Le i kika kyotangidije mu ñeni yobe? Le ulanga’po namani? Le bisakasaka mutyima obe i bimanine pa bintu bya būmi bwa dyalelo’ni, nansha i pa būmi bwa kumeso ne kubambila meso sō pa bilaile Leza? (Mat. 6:24, 31-33; Luka 8:14) Mufwaninwe kwikala na lwitabijo lukomo pa kusaka’mba bilongwa byenu bikwatañane na milao ya Leza, mu kifwa kya ba Abalahama ne Mosesa. (Bah. 11:8-10, 24-26) Le i muswelo’ka omubwanya kutamija lwitabijo ludi na luno ne kwishimikila ‘kyalwilo kilumbuluke kya būmi bwa kumeso’?—1 Tem. 6:19.
2. I ñeni’ka yotuboila ku kifwa kya Mulopwe Yoshia?
2 Kimbai Yehova: Shi udi na kibidiji kya kwingidila pamo na kisaka kyenu mingilo ya ku mushipiditu, nabya i kya kutendelwa. Ino kokilanga amba kino kibidiji kyonka kyonka kyo kikakupa lwitabijo lukomo akyo kine. Bikusakila abewa mwine kukimba Yehova mwanda wa kutana “buyuki bwinebwine bwa Leza.” (Nk. 2:3-5, NW; 1 Bil. 28:9) Kino kyo kyālongele Mulopwe nkasampe Yoshia. Nansha byaātamīne mu ngikadilo mityani ku mushipiditu, ino aye papo na myaka 15 “washilula kukimba Leza wa Davida shandi.”—2 Bil. 34:3.
3. Dyalelo bankasampe bene Kidishitu babwanya kukimba Yehova muswelo’ka?
3 Le i muswelo’ka obwanya kukimba Yehova? I na kubandaula na katentekeji byobya byokulupile ne ‘kutompa’ abe mwine shi bine buno bo bubinebine. (Loma 12:2) Kifwa, le ukokeja kushintulula kinena Bible pa mwanda wa mashi nansha kuleta bubinga bulombola’mba Bulopwe bwa Leza i bushilule kubikala mu 1914? “Kuyūkidija kwa [bu]binebine” i kintu kya mvubu kikwasha pa kwishimikila kyalwilo kilumbuluke kya būmi bwa kumeso.—1 Tem. 2:3, 4.
4. I muswelo’ka basapudi bampikwa kubatyijibwa obakokeja kumwekeja kwendelela kwabo ku meso a bonso?
4 Kukimba kwākimbile Yoshia Leza kwālupwile bipa biyampe. Kumeso kwa aye kufikila pa myaka 20, wānyongolwele ntanda ku butōtyi bwa bubela na bukankamane bonso. (2 Bil. 34:3-7) Nobe monka na monka, kwendelela kobe ku mushipiditu kukamweka ku meso a bonso mu bilongwa byobe. (1 Tem. 4:15) Shi wi musapudi wampikwa kubatyijibwa, wikankile’ko kulumbulula mwingilo obe. Kokisangela’nka kupāna mabuku bitupu. Witudile’ko ne kitungo kya kwingidija Bible, kulanguluka pamo na bantu, ne kutamija kusangela konso kotana. (Loma 12:7) Kino kikakukwasha utame ku mushipiditu.
5. Le i mikenga’ka idi na bene Kidishitu babatyijibwe ya kutandabula mwingilo wabo?
5 Pa Yehova Bilumbuluke Byobe: Ukekala mwingidi mutombolwe na Leza kitatyi kyokalombola kwipāna kobe kudi Yehova na kubatyijibwa. (2 Kod. 3:5, 6) Kubatyijibwa kukakushitwila mikenga ya kwingidila Yehova mwingilo wa kitatyi kyonso. I kubadila’mo ne bupania, kwingila ku Betele, bu mishonele, ne mwingilo wa ntanda yonso. Miswelo mikwabo ya kutandabula mwingilo obe i ne kwifunda ludimi lweni nansha kuvilukila kokwa kusakilwa bukwashi bukatampe.
6. I muswelo’ka umo ne umo wa umbatwe wabwanya kwishimikila kyalwilo kilumbukuke kya būmi bwa kumeso?
6 Na bubine, ke bonsopo babwanya kufikila pa ano madyese a mingilo, inoko muntu ne muntu umbukata mwetu ubwanya kupa Yehova bilumbuluke byandi byonso. (Mat. 22:37) Nansha shi udi mu ngikadilo’ka, tula kwingidila Yehova bu kitungo kya mu būmi bobe. (Mit. 16:5) Shi ulonga namino, kukabulwepo kwishimikila kyalwilo kilumbuluke kya būmi bwa kumeso.