Kutamija Bupwani na Yehova
1. I bika byajingulwile kaka umo pa mwanda utala bibidiji byandi bya ku mushipiditu?
1 “Kendi pano mu bubinebine myaka 20 pakwabo ne kupita’po, ino kyami’nka kwenda koñendanga ku kupwila ne mu mwingilo wa budimi,” mo munenene kaka umo mwine Kidishitu. Inoko ubweja’ko amba: “Nemufike pa kuyuka’mba nansha kupwila ne mwingilo wa budimi byobidi na mvubu, bine, ke’nkapo abyo kete biñimanijanga shi bintu bibashilula kukoma. . . . Pano najingulula’tu amba mfwaninwe kulemununa mulangilo wami nshilule kwikala na mpangiko ya kifundwa kisumininwe mwa kuyukila Yehova ne kumuswa ne kufwija’ko pangala pa byonso bitupele wandi Mwana.”
2. I kika kinenenwa’mba kutamija bupwani na Yehova kudi na mvubu?
2 Kwikala na kipwano kya pabwipi na Yehova kulomba kulonga bukomo. Kulomba bivule kupita’ko’nka kulonda na kibidiji bitupu mingilo ya bwine Kidishitu. Shi twi bakomenwe kwisamba na Yehova kitatyi ne kitatyi, nankyo bidi pamo’nka bu batwe kebakisambangapo na mulunda netu wa pa mutyima. (Kus. 2:4) Tubandaulei nanshi ne kumona muswelo kifundwa ne milombelo obibwanya kwitukwasha tutamije bupwani na Yehova.—Mit. 25:14.
3. I muswelo’ka wa kwifunda kifundwa kya kasuku witukwasha tufwene kudi Leza?
3 Milombelo ne Kulanguluka Bidi na Mvubu: Kifundwa kya kasuku kitenga mutyima kilomba bivule kupita’ko’nka kushika myanda mikatampe ya mu kifundwa ne kwela diso mu bisonekwa bitelelwe kete. Akyo kitusakila kubandaula myanda yokitusokwela pa bitala mashinda a Yehova, misoñanya, ne bumuntu bwandi. (Div. 33:13) Kwivwanija myanda ya ku mushipiditu kuteñanga malango etu kadi kwitukunkanga tulangulukile pa būmi bwetu. (Mit. 119:35, 111) Kifundwa kya kasuku kifwaninwe kwifundwa na kitungo kya kufwena kudi Yehova. (Yak. 4:8) Kifundwa kisumininwe kilomba kitatyi ne kifuko kifwaninwe, kadi kwifunda kwa kitatyi kyonso kusakila kwidingila abe mwine. (Dan. 6:10) Nansha shi udi na mingilo mivulevule mu bobe būmi, le wabulwa’po kwitudila’ko kitatyi ku difuku ne difuku kya kulanguluka pa ngikadilo milumbuluke ya Yehova?—Mit. 119:147, 148; 143:5.
4. Kulombela pa kwifunda kifundwa kya kasuku kwitukwashanga muswelo’ka tutamije bupwani na Yehova?
4 Kubadikila na milombelo i kipindi kimo kya mvubu mu kifundwa kya kasuku. Pa kusaka’mba bubinebine bwa Bible butenge mityima yetu mwanda wa “kumwingidila Leza mīngilo ya kumuloeleja ku mutyima, ne ya kwakamwa kwa Leza, ne luzakalo ponka,” bitusakila kwikala na mushipiditu sandu wa Leza. (Bah. 12:28) Nanshi, tufwaninwe kushilula kifundwa ne kifundwa na kulomba Yehova mushipiditu wandi. (Mat. 5:3) Kitatyi kyotulanguluka pa Bisonekwa ne kyotwifunda mabuku apānwa na bulongolodi bwa Yehova, tushitwilanga Yehova mutyima wetu. (Mit. 62:8) Kwifunda kifundwa mu uno muswelo i kutōta kotutōta Yehova ne kuningisha lulamato lwetu kwadi.—Yude 20, 21.
5 Kipwano kyetu na Yehova kibwanya kutamijibwa nyeke mwa kulamina’kyo mu būmi bwetu bonso, pamo’nka na mwikadilanga bipwano byonso. Nanshi, tukūlei kitatyi difuku ne difuku mwanda wa kufwena kudi Leza, ke-muntu nandi uketufwena.—Mit. 1:2, 3; Ef. 5:15, 16.
5. Mwanda waka kulanguluka pa Kinenwa kya Leza difuku ne difuku kudi na mvubu?