Ūminina na Kusapula
1 Tudi mu myaka ya malwa. Ñuma ya tubila, mavita a mizo, bimpengele bya kipangila, ne binkumbulu bikwabo bilenga nzuba bibasambakana pi na pi. Pano po pene pasakilwa muzo wa muntu myanda miyampe. Inoko, buñumauma ku bintu bya ku mushipiditu nabo bubazambalala. Mu bifuko bimo, ke bikomo kutana bantu ku mobo, kadi ke bikole’nka ne kusokola muntu wa kwitwivwana nansha usaka kwifunda Bible. Nansha namino, i biyampe tūminine na kusapula myanda miyampe ya Bulopwe bushimikilwe na Leza.—Mat. 24:14.
2 Kuswa Bantu: Busapudi bwetu bulombola amba Yehova uswele bantu. “Kasakilepo’mba, nansha umo ōneke, mhm, poso’mba, bonsololo bafikile pa kwalamuka pa mutyima.” (2 Pet. 3:9; Ezek. 33:11) Pa kino, i mulete lubila, monka mwānenene Yesu amba, “Myanda-miyampe īsaka kubadikila kusapwilwa ku mizo yonso ya bantu.” (Mako 13:10) Leza ukokanga bantu bavundamukile kwadi ne kwipandija ku bonakani bwa ntanda ya Satana bwiya’bu. (Yoe. 2:28, 29, 32; Zef. 2:2, 3) Mwene tufwijanga’ko Yehova pa kwitupa uno mukenga?—1 Tem. 1:12, 13.
3 Lapolo wa ntanda yonso ulombola amba mu mwaka wa mingilo wa 2004, mwayene wa bifundwa bya Bible 6085387 byadi byendejibwa kweji ne kweji kadi amba mwayene wa kintu kya bana ba bwanga bapya 5000 badi babatyijibwa yenga ne yenga! Bamo mu bano bapya bepēne basokwelwe mwanda Yehova waesele kininga kya basapudi baendelele na kwisamba na muntu yense wa mu mwaba obapelwe. Bine, kino i kya nsangaji ku bipwilo, kadi i dyese dikata dya kwingila pamo na Leza mu uno mwingilo upandija būmi bwa bantu!—1 Kod. 3:5, 6, 9.
4 Kutendela Dijina dya Leza: Ponso potwendelela na kusapula tutendelanga Yehova patōkelela ne kutumbija dijina dyandi ku bantu bonso. (Bah. 13:15) Satana i mongole “panopantanda ponso” amba Leza kadipo na bukomo bwa kupwija makambakano a bantu, ne amba katelepo mutyima ku masusu obasusuka, pakwabo amba kadi’kopo ne kudi kwine. (Kus. 12:9) Kupityila ku busapudi botusapula, tulwilanga bubinebine butala padi Tata wetu wa mūlu ne wa ntumbo. Nanshi twendelelei na kutendela dijina dyandi—tamba pano ne nyeke ne nyekeke.—Mit. 145:1, 2.