Mpangiko ya Kisaka—Mwingilo wa Budimi wa Kisaka
1 Yehova uloelelwe pamona bana batendela dijina dyandi. (Mit. 148:12, 13) Mu myaka ya Yesu ‘twana ne twa lukeke tukyamwa twādi tutendela’ Leza. (Mat. 21:15, 16) Ne dyalelo nadyo bidi muswelo umo onka. Shi ke pano, banwe bambutwile, le mukokeja namani kukwasha benu bana batendele na bupyasakane Yehova mu uno mwingilo wa bwine Kidishitu? Monka mwesambile na kukoma kishinte kidi kūlu’ki, kitala pa kupwila kwa pa kipwilo, lufungulo’tu lwa mvubu i kimfwa kyenu. Shabana umo wānene mwiivwaninanga bambutwile ba pi na pi amba: “Bana kebaloñangapo byobya byonena; baloñanga byobya byolonga!”
2 Kaka wālelelwe na bambutwile bakaminwe Leza uvuluka amba: “Ketwādipo tulanguka mu dya Mposo lubanga ketwiipangula shi tusa kutambila mu busapudi, mhm. Twādi tuyukile amba tufwaninwe kwenda.” Mo monka, nenu kunai mu benu bana kamweno kadi mu mwingilo wa busapudi na kutandika mpangiko mijalale yenga ne yenga ya kutambila mu mwingilo wa budimi mu kisaka. Kino kekikakwashapo enka bana befunde na kwimutala, ino kikemukwasha nenu mumone ngikadilo yabo, miswelo, ne bwino bwabo.
3 Bufundiji bwa Bityebitye: Shi musaka bana baloelelwe mwingilo wa busapudi, nabya mwiteakanyei nabo mwa kusapwila biyampe. Kaka otwapwanga kutela’wa unena monka amba: “Ketwādipo tukatwala bambutwile betu mu mwingilo wabo bitupu. Twādi tuyukile’mba netu tudi mu mwingilo, nansha byotwādi tukokola enka bitupu ne kushiya kakanda. Twādi tuyukile byotukanena kupityila ku kwiteakanya kwa binebine kumeso kwa mingilo yonso ya ku mfulo kwa yenga.” Nenu mubwanya kwiija benu bana na kwitūdila’ko minite ibala-inga yenga ne yenga ya kwibateakanya pa mwanda wa mwingilo, shi mu kifundwa kya kisaka nansha kitatyi kikwabo.
4 Kusapula pamo na kisaka kubwejanga’ko mikenga ya kukomeneja bubinebine mu benu bana. Shabana umo mwine Kidishitu wadi usela wandi mwana mwana-mukaji paadi wenda ku kilometele 10 kukapāna matrakte ku bekadi ba mu bibundi byādi mu lupongo lukwabo. Kaka uvuluka na kuloelelwa’mba: “Tata wātwejeje bubinebine mu mutyima wami umbula bwa kuno kujokoloka.” (Kup. 6:7) Nenu mukokeja kweselwa mu uno muswelo shi mutandike mpangiko ya busapudi pamo na kyenu kisaka yenga ne yenga.