Kimba Mikenga ya Kusapula
1 Kipwilo kya Bwine Kidishitu i kibundwe na bantu ba ngikadilo mishileshile. Inoko, tudi umbumo mwanda tusumininwe kutendela Yehova. (Mit. 79:13) Shi misongosongo ne ngikadilo mikwabo ikoleja itujikila mashinda a kusapula myanda miyampe, nabya tukalonga namani pa kukimba mikenga ya kusapula?
2 Mu Mingilo ya Difuku ne Difuku: Yesu wādi uboya mikenga mu bilonga bantu difuku ne difuku ne kwibasapwila’mo bukamoni. Wēsambile na Mateo paādi upita pa bilo ya musonko, na Zakiasa paādi mu lwendo, ne na mwana-mukaji Mwine Samadia paādi ukōkolokwa. (Mat. 9:9; Luka 19:1-5; Yoa. 4:6-10) Mu mingilo ya difuku ne difuku, tukokeja netu kwisamba na bantu ne kwibasapwila bukamoni. Ikala na Bible ku makasa pamo ne matrakte ne maboloshile, nabya ukamona bukomo bwa kwisambila pa lukulupilo lobe.—1 Pet. 3:15.
3 Lelo ushikete kijabanda kobe ne le kino kikukankaja kusapula ku njibo ne njibo? Nabya tadija mikenga ya kusapula bukamoni ku boba bāya kukundapa nansha bonso bāya kukumona. (Bil. 28:30, 31) Shi ngikadilo yobe ikulomba kwikala mu njibo kobe, lelo kodi mutompe bidi ne busapudi bwa ku telefone nansha bwa na mikanda? Kaka umo wadi utuma kitatyi kivule mikanda ku banababo ke Batumonipo. Wadi utweja’mo milangwe ya mu Bible ne bintu byaadi wimwena paadi usapula.
4 Ku Kaji Nansha ku Masomo: Kyotusaka i kutendela Yehova, o mwanda kino kitutonona tukimbe mikenga ya kukuna nkunwa ya bubinebine ku kaji nansha ku masomo. Musapudi umo wa myaka mwanda wadi usapwila kalasa kabo bintu byaadi utanga mu Réveillez-vous ! pa midi. Mwadimu wandi pa kupwa kuyuka i kwepi kwaselanga milangwe, waitabija kupebwa Kiteba kya Mulami ne Réveillez-vous ! kitatyi kyonso. Ku kaji nako, ukokeja’tu kwilamija dibuku dyetu Bifundija Bible ne kutūla’dyo pantu pamona bakwenu, kino kikalupula bipangujo bikatwala ku kusapula bukamoni.
5 Le ubulwe’po kulanga mashinda a kukimba mikenga ya kusapula poingila mingilo ya difuku ne difuku? Shi ulonge bukomo mungya ngikadilo yobe, bine kukabulwepo difuku ne difuku ‘kulambula kudi Leza kitapwa kya lutendelo.’—Bah. 13:15.