Kwatakanya Mikenga Yobe ya Kusalaja Musapu wa Bulopwe!

1. Lelo i ñeni’ka yotubwanya kuboila ku kimfwa kya Davida?

¹ Mulopwe Davida kādipo uleka ngikadilo imufikila imuzozeje. Kimfwa, Davida wāsakile kūbaka njibo ya Yehova. Ino kitatyi kyobāmukankeje kwiyubaka, Davida wajadikile bitungo byandi ne kukwasha wakwasha Solomone na kumuteakenya bintu bya kūbaka nabyo tempelo. (1 Ba. 8:17-19; 1 Bi. 29:3-9) Pa kyaba kya kukambakena byobya byākadipo ubwanya kulonga, Davida wāimanine pa byobya byabwanya. Lelo i muswelo’ka otubwanya kwiula kimfwa kya Davida kitatyi kyotukimba mikenga ya kusalaja musapu wa Bulopwe?

2. Lelo i bubandaudika botubwanya kwibandaula?

² Longa Byobya Byobwanya: Bavule i bapēleje bwabo būmi mwanda wa kwingila bupania mukwashi nansha wa lonso. (Mat. 6:22) Le ubwanya kwilunga nabo? Shi ulangulukile pa yobe ngikadilo mu milombelo, padi ukamona’mba “kibelo kikatampe kitwala ku mingilo” i kikushitwilwe ne abe. Shi bidi namino, kwatakanya uno mukenga!—1 Ko. 16:8, 9.

3. Nansha shi ngikadilo yetu keitulengejapo kwingila bupania, le i mikenga’ka ya kusapula yotubwanya kukwatakanya?

³ Le bikekala namani shi ubamone’mba ngikadilo yodi’mo ikukankaja kwingila bupania? Kokasebula mikenga mikwabo yodi nayo. Kimfwa, shi ku kaji koingilanga mwitananga’ko na bantu ke batumonipo, mwene’mba i biyampe kukimba’ko mukenga muyampe wa kwibasapwila? Shi ubelanga, ubulwepo kukwatakanya’ko mikenga ya kusapwila bamuñanga? Vuluka’mba boba bakomenwa kusapula bininge i bakwatyilwe mpangiko ya abo kulete lapolo nansha ya minite 15 pa mwanda wa bununu nansha misongo. Kitatyi kyodinga lapolo obe wa mingilo wa ku kweji, vuluka kwela’mo ne kitatyi kyowasapwile bya kiponka na ponka na kupāna mabuku, matrakte ne tukanda twa lwito lwa ku Kivulukilo ne lwa ku kitango. Padi ubwanya kutulumuka pa kumona bitatyi byowadi umona na bityetye byakandija kibalwa kya mansá!

4. Le ubasumininwa kulonga bika?

⁴ Nansha shi tubaikala mu ngikadilo ya muswelo’ka, tukwatakanyei mukenga onso wa kusalaja myanda miyampe. Shi tulonge namino, nabya tukemwena nsangaji ya kuyuka’mba tuloñanga byonso byotubwanya pa mwanda wa tumweno twa Bulopwe.—Mako 14:8; Luka 21:2-4.