Le Wipangwilanga’ko Bifundwa Bikwabo?

Shi wendejanga kifundwa kya Bible, mwene ukokeja kutompa kwipangula mwifundi shi udi na mulunda, na mubutule, nansha muntu mukwabo muyukane ukimba kuyuka byobya bifundija Bible? Divule muntu wipangulwa uletanga majina mavule. Shi omwifunda nandi waitabija kukatela dijina dyandi pokamona bano bantu ne kwibanena mwifunde nabo Bible, ukokeja kushilula namino: “Twifundanga na kampanda [dijina dya mwifundi] kifundwa kya Bible, ino waunombwele amba nobe ukokeja kumwena mu kino kifundwa kya Bible kya ku bitupu.” Kupwa mulombole mu kīpi motwifundilanga na kwingidija dibuku Bifundija Bible.

Shi omwifundanga nandi wendelela kumeso, ukokeja kumukankamika alombole mulunda nandi nansha ba mu kisaka kyabo motwifundilanga Bible shi baswele. Kupwa ukokeja kwibeta bāye batanwe pomwifunda. Pakwabo napo shi bino kebibwanikapo, nabya kwata mpangiko ya kwimona nabo ne kwibalombola motwifundilanga Bible. Kino kikakwasha ne mwifundi nandi ashilule kusapwila bakwabo buyuki bwa mu Bible bwafunda.

Boba bojokelanga kutala kitatyi ne kitatyi nabo bakokeja padi kukutelela bantu basaka kwifunda nansha shi abo bene kebashilwile kwifunda Bible. Kitatyi kyowibapa dibuku Bifundija Bible, ukokeja kwipangula’mba, “Lelo uyukile’ko muntu mukwabo ukokeja kusangela kino kitabo?”

Byotudi mu bitatyi bya kupelakana nabyo, i biyampe twingidije mikenga yonso imweka mwanda wa kukwasha bantu bateje ne kwitabija myanda miyampe. Le wipangwilanga’ko bifundwa bikwabo?