Miswelo Itano ya mwa Kusokwela Kifundwa kya Bible
1. Le i bika byotufwaninwe kulonga shi tumona amba i bikomo kusokola kifundwa kya bible mu mwaba wetu, ne mwanda waka?
1 Lelo kodi mumone kyaba kimo amba i bikomo kusokola muntu wa kwifunda nandi Bible? Wielele’ko nyeke kukimba. Yehova weselanga boba bendelela kulonga kiswa-mutyima kyandi pampikwa kukōka. (Ngat. 6:9) Kunshi’ku ibalete’ko madingi atano akakukwasha.
2. Le i muswelo’ka otukengidija muneneno wa patōkelela mwanda wa kushilula kifundwa?
2 Nena Patōkelela: Bantu bavule bayukile amba tupānanga Kiteba kya Mulami ne Révéillez-vous !, ino kebayukilepo amba tushilulanga ne bifundwa bya Bible. Le ubulwe’po kunena patōkelela kitatyi kyosapula ku njibo ne njibo? Ubwanya ne kwipangula boba basangela musapu bowisamba nabo shi bakasangela wifunde nabo Bible. Shi abapele, nabya abe endelela na kupāna mapepala ne kutamija nyeke kusangela. Tutu umo wapempwile ba mulume ne mukaji bamo mu bula bwa myaka mivule mu dishinda dyandi bya mapepala. Pa kupwa kwibashila nimelo ya mfulo ya mapepala, walonga na aye ukajoka ino penepa mulangwe wamwiya’mo webepangula amba: “Lelo mukasangela kwifunda nami Bible?” Na bya dyese baitabija kwifunda. Panenwa pano kebabatyijibwe.
3. Le tubwanya kunena amba boba bāyanga ku kupwila befundanga kala Bible na muntu kampanda? Shintulula.
3 Bapya Bāya ku Kupwila: Kokalanga amba boba bāyanga ku kupwila kwa pa kipwilo badi kala na bobefundanga nabo Bible. Tutu umo usoneka amba: “Bavule mu bantu bonadi nefunda nabo Bible, i boba badi bāya ku kupwila.” Kaka umo watompele kufwena lolo umo wa bumvu wadi na bana bana-bakaji babatyijibwe’nka mu kipwilo’kya. Uno lolo watenwe ku kupwila mu bula bwa myaka 15, ino wadi wiya nyeke ku Njibo ya Bulopwe kitatyi’tu kishilula kupwila ne kutamba kitatyi’tu kifula kupwila. Lolo’wa waitabija kwifunda ne mwenda mafuku watwela mu bubinebine. Kaka usoneka amba: “Nalombe lusa pa kukungila konakungile bidi myaka 15 ebiya nkemwipangula shi ukasangela kwifunda Bible!”
4. Le i muswelo’ka otukokeja kusokola kifundwa kupityila ku kwipangwila’ko?
4 Ipangwila’ko: Kaka umo uloñanga bukomo bwa kushindikila bakwabo ku bifundwa byabo bya Bible. Ku mfulo, pa kulomba lupusa kudi mwanetu wadi wendeja kifundwa, waipangwile kifundwa’kya shi ukokeja kuyuka’ko bakwabo babwanya nabo kusangela kwifunda. Nanshi, kitatyi kyopa muntu okampempwile dibuku Bifundija Bible, ubwanya kumwipangula amba: “Le uyukile’ko muntu mukwabo ubwanya kusangela dino dibuku?” Kyaba kimo, ngikadilo ibwanya kulengeja basapudi nansha ba pania bakomenwe kwendeja kifundwa na bantu bobatāna mu mwaba. Shi bidi namino, lombola bakwabo amba udi na mutyima wa kwendeja kifundwa kya Bible.
5. Mwanda waka tufwaninwe kwipangula bampikwa kwitabija badi na bene-pabo betabije shi bakasangela kwifunda Bible?
5 Mwine Petu Wampikwa Kwitabija: Le mu kyenu kipwilo mudi’mo ne basapudi basongelwe na bampikwa kwitabija? Bampikwa kwitabija bamo bapelanga kwisambila pa Bible na bene-pabo Bene Kidishitu, inoko babwanya kwitabija shi muntu wa panja pa kisaka webanena befunde. Divule dine i biyampe bidi kwipangula mulume nansha mukaji wandi mwitabije mwanda wa kuyuka mwa kwisambila nandi.
6. Le milombelo idi na mvubu muswelo’ka kitatyi kyotulonga bukomo bwa kusokola kifundwa?
6 Milombelo: Kokatyepeka bukomo bwa milombelo. (Yak. 5:16) Yehova i mulaye kwivwana kulomba kwetu shi i kukwatañane na kiswa-mutyima kyandi. (1 Yoa. 5:14) Tutu umo wadi muvudilwe bya kulonga, washilwile kulombela mwanda wa kusokola wakwifunda nandi Bible. Wandi mukaji wadi wiipangula shi mulume ukekala na kitatyi kya kuta mutyima ku kifundwa kyandi, nakampata shi kifundwa’kya kidi na myanda mivule. Penepa mukaji watūdile uno mwanda kudi Yehova kitatyi kyaadi ulombela mwanda wa mulume asokole kifundwa. Milombelo yabo yalondolwelwe pa kupwa’tu kwa mayenga abidi, kitatyi kyatene pania umo wa mu kipwilo mwana-mulume wadi usaka kwifunda; penepa wakanena tutu’wa efunde nandi. Mukaji usoneka amba: “Ku yewa yense umona amba kwendeja kifundwa kya Bible i kukomo, Ami nanena amba: Nena obe mwanda patōkelela mu milombelo, kadi kitatyi kyonso kyolombela kokelwa kutela uno mwanda. Batwe pano tudi na nsangaji yonkidipo ne mwa kwiidingakenya.” Shi utakamane, nobe ukabwanya kusokola kifundwa kya Bible ne kwimwena nsangaji idi mu kukwasha muntu atwele mu “kabelo ka kutwala ku bumi.”—Mat. 7:13, 14.