Ikala na Bibidiji Biyampe, Ukamwena’mo Byabuyabuya Bivule
1. Mwanda waka i biyampe ubandaule bibidiji byobe bya ku mushipiditu?
1 Powaikele Mwine Kidishitu dibajinji, walongele bukomo bwa kutamija bibidiji biyampe bya ku mushipiditu, kimfwa kwifunda Bible, kutanwa ku kupwila, kutambila mu mwingilo wa budimi, ne kulombela. Pa kino, Yehova waesele bukomo bowalongele, ne kutama watama ku mushipiditu. Padi tamba ubatyijibwa pano kepadi myaka mivule. Lelo ukilamine bibidiji biyampe bya ku mushipiditu byowadi nabyo powaikele Mwine Kidishitu?
2. I byabuyabuya’ka bimwenwa mu kutanga Bible difuku ne difuku?
2 Bandaula Bibidiji Byobe: Lelo ukidi na kibidiji kya kutanga Kinenwa kya Leza difuku ne difuku? Shi i amo, nabya kukabulwepo kumwena’mo byabuyabuya! (Yos. 1:8; Mit. 1:2, 3) Mu Isalela wa kala, mulopwe ne mulopwe wādi unenwe kutentula Bijila ne kutanga’mo “nyeke mafuku onso a bumi bwandi.” I bika byaādi wa kumwena’mo? Wādi wa kwikala na mutyima wa kwityepeja ne wa kwakamwa Yehova pa kuleka kusasuka mu mbila yandi. (Kup. 17:18-20) Netu dyalelo, shi tutanga Bible difuku ne difuku tukekala bakubulwa kutopekwa ne ba binebine mu ino ntanda mibi ne mikondame. Kadi tukekala babwanye byonso mu mwingilo wetu.—Fid. 2:15; 2 Tem. 3:17.
3. I byabuyabuya’ka byotumwena mu kutanwa nyeke ku kupwila?
3 Yesu wādi na kibidiji kya kwenda ku shinakoka kwādi kutangwa Bisonekwa. (Luka 4:16) Kino kekyābudilwepo kumukankamika akomene matompo āmutene. Netu tukakomejibwa na bufundiji bwa ku mushipiditu bupānwa ku kupwila kwa pa kipwilo kadi ketukabulwepo ‘kwikankamika bātwe bonso.’ (Loma 1:12) Kubungakana pamo na banabetu kwitukwasha tūminine mu malwa a mu mafuku a ku mfulo. (Bah. 10:24, 25) Le nobe udi na kibidiji kya kutanwa ku kupwila konso?
4. Lelo kutambila mu mwingilo wa budimi yenga ne yenga kudi na kamweno’ka kotudi?
4 Bilembwa bikola bitulombola amba batumibwa bādi basapula myanda miyampe ‘mobukila, mobukila, mafuku onso, mu njibo ikola ya Leza ne mu mobo bitupu.’ (Bil. 5:42) Padi i bitukomene kusapula mobukila mobukila, ino mwene tukokeja kwikala na kibidiji kya kusapula yenga ne yenga? Namino tukekala basendwe mu kwingidija Kinenwa kya Leza, kadi tukekala na nsangaji pa kusapwila bakwetu bubinebine bwa mu Bible.
5. Mwanda waka i kya kamweno kulombela kudi Yehova kitatyi kyonso?
5 Mupolofeto Danyele wāeselwe bikatampe pa kwingidila Yehova “mafuku onso nyeke” mu būmi bwandi. Mu mingilo ya mafuku onso mubadilwa ne kibidiji kya kulombela nyeke Yehova. (Dan. 6:10, 16, 20) Mo monka netu shi tunyemena nyeke kudi Yehova kupityila ku milombelo ya kyanga, bine, kakabulwepo kwitupa mushipiditu sandu wandi. (Luka 11:9-13) Ne kadi, Yehova uketufwena, mwanda uketabija tupwane nandi kipwano kikatampe. (Mit. 25:14; Yak. 4:8) Bine, bino byo byabuyabuya bikatampe! Shi ke pano, tulongei bukomo bwa kwikala ne kulama bibidiji biyampe bya ku mushipiditu mwa kumwena byabuyabuya bivule bitamba kudi Yehova.