“Kebinsangejepo”
1 Mu bifuko bimo, bantu bebidile kwitulondolola uno muswelo potusapula. I bika biketukwasha tuleke kutyumukwa mutyima shi tubatana buñumauma mu mwaba wetu? Tukokeja kusonshila namani bantu bate mutyima ku myanda miyampe?
2 Lama Nsangaji: Kuyuka kine kikadile bavule na buñumauma kuketukwasha tulame nsangaji yetu. Bantu bafundile lufundijo lwa kwialamuna kwa bintu nansha batamīne mu bantu banena amba Leza kadi’kopo kebekalangapo bakwata Bible makasa abidi. Bakwabo padi bavutakanibwanga ñeni na buzanzangi bobamona mu bipwilo. Bamo nabo badi na buñumauma mwanda i bafitwe mutyima ne kubulwa lukulupilo. (Ef. 2:12) Pakwabo bamo ‘kebatele’kopo mutyima’ mwanda i balēmenenwe na kuzumbijazumbija mutyima.—Mat. 24:37-39.
3 Tukokeja kwikala na nsangaji mu busapudi nansha bamo byobapela kuteja, mwanda tuyukile amba bukomo botulonga butumbijanga Yehova. (1 Pet. 4:11) Kadi, kusapula bubinebine kukomejanga lwitabijo lwetu, nansha ke popa potusapwila boba kebasangedile’bopo pene. Tumonei nanshi bantu ba mu mwaba wetu monka mwibamwena Yehova. Aye wāfwidile Bene Nineva lusa mwanda kebādipo bayukile “kusansanya ku kuboko kwabo kwa lundyo ne kwa lunkuso.” (Yona 4:11) Bine, boba badi mu mwaba wetu nabo basakilwa myanda miyampe! Nanshi ketwakikōkai, ino tulongei bukomo bwa kwibasolokeja mutyima balonde musapu wa mu Bible.
4 Wisambile pa Byobakalakala Nabyo: Ubwanya padi kutela mu ntwelelo yobe mwanda ukalakala nao bantu ba kwenu ne kunena mwisambi nobe nandi alombole mwamwena’o. Kupwa teja byanena, ebiya komulombola musapu usenga udi mu Bible utala pa mwine mwanda’wa. Mu kibundi kimo mwalongekele kinkumbulu, kupwa Kamoni washilula kudidila bantu bulanda na mutyima umo ku kibelo ne kibelo. Unena’mba: “Ponka’po bantu bashilula nabo kunena. Nesambile mīsambo isangaja na bantu bavule dyodya difuku mwanda natele mutyima ku bibakambija umbūmi.”
5 Bulopwe bwa Leza bukapwija makambakano onso ekonda na bantu. Tompa nanshi kunañuna i bika bikalakala nabyo mwisambi nobe. Padi uketabija umushintulwile musapu wa mu Bible uleta lukulupilo. Shi ketabijepo, padi ukateja “ne dikwabo uno mwanda.”—Bil. 17:32.