Lelo Tuloñanga Kika Pa Kumona buñumauma?
1 Buñumauma i ngikadilo ya muntu udi na bujundu, kayukile kubezemuka, kubanga bimunenwa nansha kwialakanya. I mwikadila umo wa mu mikadila isambakene konso konso, mikomo kunekenya yotutananga mu busapudi. Lelo tuloñanga kika pa kumona buñumauma? Lelo bwituzozejanga mu mwingilo wetu? Ne i muswelo’ka otukokeja kunekenya buñumauma bwa bantu mwanda wa tumone kwibasapwila musapu wa Bulopwe?
2 Dibajinji bidi, tufwaninwe kuyuka buluji bwikadile bantu ba mu wetu mwaba na buñumauma. Lelo i mwanda abakoka pa kumona bintu bilonga bendeji ba kipolitike ne bakulumpe ba bipwilo’ni? Le i mwanda bamwene amba kekudipo muswelo wa kupwija makambakano obekoka nao’ni? Lelo kudi milao ya bintu bilumbuluke ibōmija mityima’ni? Nansha bapelanga kwisambila pa bintu bya kumushipiditu amba kemudipo kamweno ka panopano, kamweka na meso?
3 Kokela Milangwe pa Lukulupilo lwa Bulopwe: I kutupu makambakano akakoma kupwijibwa na Bulopwe. O mwanda, shi bibwanika, tufwaninwe kwisambila pa milao ya Bulopwe, mungya myanda mikatampe isambilwe mu Bible, nansha shi kebibwanikapo nansha kebifwaninwepo kulombola kisonekwa kya Bible. (Bah. 4:12) Ino, i muswelo’ka otukokeja kufikija ku ino mīsambo?
4 Bantu bafwaninwe kuyuka kitungo kyotwibapempwila. I kiyampe kwibevwanija’mba kitutonona tukebamone i buswe botusenswe muntu netu ne mutyima otutele bekalwa netu. Tukokeja kwibepangula kipangujo kilanguluja pamo bwa kino, “Molangila, i kika kikokeja kupwija [tela makambakano kampanda obadi nao mu mukenza]?” Shi ino ntwelelo ya mwanda keyendekelepo, tompa mikwabo.
5 Basapudi ba mu kibundi kimo mwadi muvudile bininge bantu bañumauma ku musapu wa Bulopwe, batompele kukimba ntwelelo yadi ikokeja kusamuna kusepelela. Tutu umo ne wandi mukaji bapimine ino ntwelelo pa kupāna dibuku Buyuki, amba: “Lelo ulanga amba kilomba enka kufunda masomo mayampe shi usaka kwikala na būmi buyampe mu ino ntanda dyalelo? Le witabije amba masomo onso matuntulu afwaninwe kwimanina ne pa buyuki bwa Bible?” Mu kyolwa kimo kyonka, baikele kuponeja mabuku asatu, umo wa mu bantu batambwile mabuku wadi mwana-mukaji wanene mwenda mafuku amba watangile dibuku Buyuki dyonso dituntulu kadi waitabija ne kwifunda Bible.
6 Kitatyi kyotutana buñumauma, tutompei kushilula mīsambo na ntwelelo mishileshile, twipangulei bipangujo bilanguluja, kadi tukulupile mu bukomo bwa Kinenwa kya Leza. Shi tulonge namino, kekubulwe padi tukakwasha bantu bakwabo nabo bekale na lukulupilo lwa kutendelwa lwa Bulopwe.