Bundapi bwa Kiñanga Bupityile Bonso—Le I Bwepi?
“Muntu yense upasulwa lupasulo pampikwa kwelwa mashi, na bubine, waundapwa bundapi bupityile bonso kashā.” Mo mwanenene Dokitele Michael Rose, mutangidiji wa bundapi ne mupotolodi wa bwanga butalula misanshi. Lelo i myundapilo’ka ne lawa’ka ya kupingakenya pa mashi ibadilwa mu “bundapi bwampikwa kwela mashi”? Ufwaninwe kuyuka’byo mwa kutyibila butyibi bupotoloke mu myanda ya bundapi ne ya lupasulo. Tala video Pas de sang : la médicine relève le défi. Kupwa, tompa buyuki bobe na bipangujo bilonda’ko’bi.—Ta mutyima: Bambutwile bafwaninwe kwikala’po na bunwa pa kutala ino video na bana batyetye, mwanda mudi bipindi bimo bīpi bilombola bantu bapasulwa.
(1) I buluji’ka bukatampe bupelelanga Batumoni ba Yehova kwelwa mashi? (2) Pa myanda itala kundapwa, le Batumoni ba Yehova basakanga bika? (3) I kyepelo’ka kibajinji kidi na bondapwa? (4) I kika kinenenwa amba kutonga lawa ya kupingakenya pa mashi i kwendele’mo ne amba i kuyuka kwiselela biselwa? (5) Shi mashi atamba mavulevule, i bintu’ka bibidi bifwaninwe kupēlakana nabyo badokitele? (6) I bwino’ka buná bwa kupingakenya pa kwelwa mashi? (7) Bamuñanga baloñanga namani (a) pa kutyepeja’ko mashi ajimina, (b) pa kulama miseke ityila ya mashi, (c) pa kutununa ngitu ivudije mashi, ne (d) pa kukūla mashi atamba? (8) Shintulula mwikadile ino myundapilo: (a) kusabula mashi (hémodilution) ne (b) kukūla mashi atamba (récupération du sang épanché). (9) I bintu’ka byofwaninwe kuyuka dibajinji pa mwanda utala malawa a kupingakenya pa kwelwa mashi? (10) Lelo mpasulo mikomo nansha mikutakane nayo ikokeja kupasulwa bantu pampikilwa kwelwa’bo mashi? (11) Le i myundapilo’ka ikokeja kushala mwenda mafuku bu ya kulondela’po bamuñanga?
Kwitabija myundapilo imoimo ilombwelwe mu ino video i mwanda wa muntu kwityibila mbila aye mwine, mungya mutyima wandi wa mundamunda mufundijibwe na Bible. Le nobe ubamone i bundapi’ka bwa kupingakenya pa kwelwa mashi bobwanya kwitabija abe ne bobe bana? Ba mu kisaka ke Batumonipo bafwaninwe nabo kulombolwa senene buno butyibi ne bubinga bomwakwatyila’bo.—Tala “Bipangujo bya Batangi” mu Kiteba kya Mulami kya 1 Kweji 7 ne kya 1 Kweji 11, 2000.