Le Uyukile Byotongele?

Kupasulwa pampikwa kwelwa mashi kwenda kuvula pano mu mpitalo ya ntanda yonso. Le nobe uyukile butongi buvule budi’ko mu mundapilo wakubulwa kwelwa mashi? Ufwaninwe kuyuka’bo mwa kuyukila bya kutonga shi kokondapwa nansha kupasulwa. Tala video Pas de sang : la médecine relève le défi. Kupwa, langulukila pa byowamona kupityila ku bipangujo bidi kunshi’ku ne kulombela ponka.​—⁠Ta mutyima: Bambutwile bafwaninwe kwikala’po na bunwa pa kutala ino video na bana batyetye, mwanda mudi bipindi bīpi bilombola bantu bapasulwa.

(1) I buluji’ka bukatampe bupelelanga Batumoni ba Yehova kwelwa mashi? (2) Pa myanda itala kundapwa, le Batumoni ba Yehova basakanga bika? (3) I kyepelo’ka kibajinji kidi na bondapwa? (4) I kika kinenenwa amba kutonga lawa ya kupingakenya pa mashi i kwendele’mo ne amba i kuyuka kwiselela biselwa? (5) Shi mashi atamba mavulevule, i bintu’ka bibidi bifwaninwe kupēlakana nabyo badokitele? (6) I bwino’ka buná bwa kupingakenya pa kwelwa mashi? (7) Bamuñanga baloñanga namani (a) pa kutyepeja’ko mashi ajimina, (b) pa kulama miseke ityila ya mashi, (c) pa kutununa ngitu ivudije mashi, ne (d) pa kukūla mashi atamba? (8) Shintulula mwikadile ino myundapilo: (a) kusabula mashi (hémodilution) ne (b) kukūla mashi atamba (récupération du sang épanché). (9) I bintu’ka byofwaninwe kuyuka dibajinji pa mwanda utala malawa a kupingakenya pa kwelwa mashi? (10) Lelo mpasulo mikomo nansha mikutakane nayo ikokeja kupasulwa bantu pampikilwa kwelwa’bo mashi? (11) Le i myundapilo’ka ikokeja kushala mwenda mafuku bu ya kulondela’po bamuñanga?

Kwitabija myundapilo imoimo ilombwelwe mu ino video i mwanda wa muntu kwityibila mbila aye mwine, mungya mutyima wandi wa mundamunda mufundijibwe na Bible. Le nobe ubamone i bundapi’ka bwa kupingakenya pa kwelwa mashi bobwanya kwitabija abe ne bobe bana, ne kudinga’bo pa kalata DPA? Shi usaka kuyukila’ko bivule pa uno mwanda, tanga na katentekeji “Bipangujo bya Batangi” mu Kiteba kya Mulami kya 1 Kweji 7 ne kya 1 Kweji 11, 2000. Kupwa ingidija dyani dya ntentekelo dya Mwingilo Wetu wa Bulopwe wa Kweji 11, 2006 dinena’mba, “Le Mwene Namani Tupindi Tutyetutye twa Mashi ne Myundapilo ya Kwingidija Mashi a Ami Mwine?,” mwa kutongela byobya byokokeja kwitabija nansha kupela. Ku mfulo, tadija shi wi musoneke butongi bobe pa kalata DPA. Ba mu kisaka ke Batumonipo bafwaninwe nabo kulombolwa senene buno butyibi ne bubinga bomwakwatyila’bo.

[Kapango pa paje 3]

• Le nobe ubamone i bundapi’ka bwa kupingakenya pa kwelwa mashi bobwanya kwitabija abe ne bobe bana?

• Le unañanga na kalata DPA kadinge kala shi kwakekele mwanda wa bukidibukidi?