Lelo Ubaleñanya’ko?

Kuleñanya kulonga bika? Kuyuja kalata DPA (kalata kobe ka kiñanga) kekalanga na Kamoni yense mubatyijibwe. Nanshi abe byokuyukilepo “kyokya kikafika mu dyakesha,” i biyampe ukwate kala butyibi ne kulombola na kusoneka bundapi ne myundapilo yoketabija kitatyi kikufikila misongo ya bukidibukidi. (Yak. 4:14; Bil. 15:28, 29) Dishike dya video inena’mba: Soigner sans transfuser — Besoins et droits du patient, dyalupwidilwe mwanda wa kukukwasha. Tala uno video, kupwa bandaula mu milombelo byowefunda na kwiipangula bipangujo bidi kunshi’ku.—Ta mutyima: Bambutwile bafwaninwe kwikala’po na bunwa pa kutala uno video na bana batyetye, mwanda mudi bipindi bimo bilombola bantu bapasulwa.

(1) Mwanda waka bamuñanga bamo pano kebadi na mumweno ungi pa mwanda utala kwela bantu mashi? (2) Leta bimfwa bisatu bilombola mpasulo mikolakane ipaswilwe pampikwa kwela mashi mu mijilo. (3) I bamuñanga ne badokitele banga ba ntanda yonso balombola mutyima wabo wa kupasula babela pampikwa kwibela mashi? Mwanda waka badi na uno mutyima? (4) Bwifundi bwa myundapilo ya ano mafuku i busokole bika pa mwanda utala kwingidija mashi? (5) I byaka’ka bidi mu kiñanga bilupuka ku kwelwa mashi? (6) Bashayuka bavule i bafule ku kunena bika pa bitala tumweno tudi mu bundapi bwa kupingakenya pa mashi? (7) I bika bilengejanga mashi ekale kutyepa? Ne akokeja kutyepa mu muntu kufika pa ludingo’ka? I bika bikokeja kulongwa pa kwialuja monka? (8) Miseke ityila ikokeja kuvudijibwa namani mu umbidi wa ubela? (9) I myundapilo’ka ingidijibwa mwanda wa kutyina kujimija mashi mavule pa kupasula? (10) Le lawa ya kupingakenya pa mashi ibwanya kwingila ne mu bana ne mu bantu batanwa na byaka bya umbūmi bilomba kundapwa bukidibukidi? (11) I musoñanya’ka umo mukatampe uyukilwa’po bundapi bulumbuluke? (12) Mwanda waka i kya kamweno Bene Kidishitu babadikile kuyukija i bundapi’ka bwambulwa mashi bobasaka? Ne bakayukija namani?

Kwitabija bundapi bumobumo bulombwelwe mu uno video i butyibi butala mutyima wa mundamunda mufundijibwe na Bible wa muntu ne muntu. Lelo kodi mutonge kala myundapilo yokokeja kwitabija, abe ne bobe bana ne kuyuja kalata ka DPA? Pa kusaka kuyukila’ko bikwabo, pituluka mu myanda idi mu dibuku ‘Buswe Bwa Leza,’ shapita 7 ne bisonekwa bilembelwe’mo. Tala ne dyani dya ntentekelo dinena amba “Le Mwene Namani Tupindi Tutyetutye twa Mashi ne Myundapilo ya Kwingidija Mashi a Ami Mwine?” mu Mwingilo Wetu wa Bulopwe wa Kweji 11, 2006. Kupwa, ta mutyima kulemba senene butongi bobe ku kalata kobe DPA. Boba bosonekele pa kalata ne ba mu kisaka ke Batumonipo bafwaninwe nabo kuyukijibwa senene butyibi bobe.

[Kapango pa paje 3]

• Lelo kodi mutonge kala myundapilo yokokeja kwitabija, abe ne bobe bana ne kuyuja kalata DPA?

• Lelo udi na kalata DPA kayuje kala shi wakafikilwe na misongo ya bukidibukidi?