Lelo Wi Mwiteakanye ku Misongo ya mu Kitulumukila?
Misongo ikokeja kupona mu kitulumukila ne kwakubulwa kulaya. (Yak. 4:14) O mwanda muntu wa ñeni uketeakanya kumeso kwa kitatyi. (Nk. 22:3) Lelo kodi mutonge ne kusoneka myundapilo yokokeja kwitabija? Pa kukukwasha mu buno butongi, kwalupwilwe Video Des alternatives à la transfusion — Documentaires mu mutwe wa mwanda wa bubidi unena’mba, Soigner sans transfuser — Besoins et droits du patient. Kitatyi kyobandila’yo, tala shi ukokeja kulondolola ku bino bipangujo. Bambutwile bafwaninwe kwikala’po na bunwa pa kutala ino video na bana batyetye, mwanda mudi bipindi bīpi bilombola bantu bapasulwa.
(1) Mwanda waka bamuñanga bamo pano kebadi na mumweno ungi pa mwanda utala kwela bantu mashi? (2) Leta bimfwa bisatu bilombola mpasulo mikolakane ipaswilwe pampikwa kwela mashi mu mijilo. (3) Mwanda waka bamuñanga ne badokitele bavule ba ntanda yonso ke badi na mutyima wa kupasula babela pampikwa kwibela mashi? (4) Bwifundi bwa myundapilo ya ano mafuku i busokole bika pa mwanda utala kwingidija mashi? (5) I byaka’ka bidi mu kiñanga bilupuka ku kwelwa mashi? (6) Bashayuka bavule i bafule ku kunena bika pa bitala tumweno tudi mu bundapi bwa kupingakenya pa mashi? (7) I bika bilengejanga mashi ekale kutyepa, ne i bika bikokeja kulongwa pa kwialuja monka? (8) Miseke ityila ikokeja kuvudijibwa namani mu umbidi wa ubela? (9) I myundapilo’ka ingidijibwa mwanda wa kutyina kujimija mashi mavule pa kupasula? (10) Le lawa ya kupingakenya pa mashi ibwanya kwingila ne mu bana ne mu bantu batanwa na byaka bya umbūmi bilomba kundapwa bukidibukidi? (11) I musoñanya’ka umo mukatampe uyukilwa’po bundapi bulumbuluke?
Kwitabija nansha kupela bundapi bumo bumo bulombwelwe mu uno video byoudi mwanda utala mutyima wa mundamunda, kokelaija’nka kibaele kibapi ebiya kotonge. Dibuku ‘Buswe bwa Leza’ mu shapita 7 ne kwa kunyemena kulombwelwe’mo, pamo ne dyani dya ntentekelo dya Mwingilo Wetu wa Bulopwe wa Kweji 11, 2006 bikakukwasha ukwate butyibi buyampe. Kupwa, shi kodi kala mubatyijibwe, lemba butongi bobe pa kalata DPA, kadi wilamije’ko kyaba kyonso.
[Bushintuludi pa paje 3]
Lelo kodi mutonge ne kusoneka myundapilo yokokeja kwitabija?