Bande wa Video Ulombola Kamweno Kadi mu Bundapi
Bashayuka mu bijila ne mu bundapi i bate mutyima bininge ku mumweno ne byepelo biluji bidi na mundapwa. Kino i kifikije pa miswelo impya ya kundapa ne mundapilo ubwanya kumwena’mo Batumoni ba Yehova. (Bilongwa 15:28, 29) Kino kyo kilombola bande wa video Soigner sans transfuser — Besoins et droits du patient. Tala uno bande kupwa upituluke mu byobya byowefunda.—Ta mutyima: Bambutwile bafwaninwe kwikala’po na bunwa pa kutala uno video na bana batyetye, mwanda mudi bipindi bimo bīpi bilombola bantu bapasulwa.
(1) Mwanda waka bamuñanga bamo pano kebadi na mumweno ungi pa mwanda utala kwela bantu mashi? (2) Leta bimfwa bisatu bilombola mpasulo mikolakane ipaswilwe pampikwa kwela mashi mu mijilo. (3) I bamuñanga ne badokitele banga ba ntanda yonso balombola mutyima wabo wa kupasula babela pampikwa kwibela mashi? Mwanda waka badi na uno mutyima? (4) Bwifundi bwa myundapilo ya ano mafuku i busokole bika pa mwanda utala kwingidija mashi? (5) I byaka’ka bidi mu kiñanga bilupuka ku kwelwa mashi? (6) Bashayuka bavule i bafule ku kunena bika pa bitala tumweno tudi mu bundapi bwa kupingakenya pa mashi? (7) I bika bilengejanga mashi ekale kutyepa? Ne akokeja kutyepa mu muntu kufika pa ludingo’ka? I bika bikokeja kulongwa pa kwialuja monka? (8) Miseke ityila ikokeja kuvudijibwa namani mu umbidi wa ubela? (9) I myundapilo’ka ingidijibwa mwanda wa kutyina kujimija mashi mavule pa kupasula? (10) Le lawa ya kupingakenya pa mashi ibwanya kwingila ne mu bana ne mu bantu batanwa na byaka bya umbūmi bilomba kundapwa bukidibukidi? (11) I musoñanya’ka umo mukatampe uyukilwa’po bundapi bulumbuluke? (12) Mwanda waka i kya kamweno bene Kidishitu babadikile kuyukija i bundapi’ka bwambulwa mashi bobasaka? Ne bakayukija namani?
Kwitabija bundapi bumobumo bulombwelwe mu uno bande wa video i butyibi butala mutyima wa mundamunda mufundijibwe Bible wa muntu ne muntu. Le uketabija bundapi’ka bwa kupingakenya pa kwelwa mashi abe nansha bobe bana? Ba mu kisaka ke Batumonipo bafwaninwe nabo kuyukijibwa senene butyibi bobe ne bubinga bwine bokwatyile’bo.—Tala “Bipangujo bya Batangi” bidi mu Kiteba kya Mulami kya mafuku 15 Kweji 6, 2004, Falanse, ne mu kya difuku 1 Kweji 11, 2000.