Balobekwe Kyabulēme
1 Mutumibwa Polo wādi ukwete na makasa abidi mwingilo wa kusapula wāmupele Leza, kadi wēutelele ne bu “kyabuleme.” (2 Kod. 4:7) Pa kuvuija uno mwingilo, wātyumwinine mu manwi bikoleja ne kupangwapangwa. Wādi usapwila yense waādi witana nandi, kukoka mpika. Wāendele ñendo mivule mikomo kadi ya kyaka pa ntanda ne pa mema. Lelo tukokeja kwiula Polo namani ne kulombola amba tusangedile mwingilo wetu? (Loma 11:13) I bika bilengeje mwingilo wetu wikale kyabulēme kipite byonso?
2 Kyabulēme Kikatakata: Byabulēme bya pano pa ntanda divule biletanga njia kadi kamweno kabyo i katyetye ne ka lupito. Ino mwingilo wetu ao wituletelanga batwe ne bakwetu bene kumo byabuyabuya bya nyeke. (1 Tem. 4:16) Ukwashanga bantu ba mityima miyampe bayuke Yehova, bashinte būmi bwabo, bamone ne lukulupilo lwa bine lwa būmi bwa nyeke. (Loma 10:13-15) Potumona mwingilo wetu bu wa mvubu, tuyukanga kine kyotwikadile’ko, twikalanga na kuloelelwa kwa endaenda, kadi twikalanga na lukulupilo lwa nsangaji lwa būmi bwa kumeso.—1 Kod. 15:58.
3 Lombola Amba Ukwete Kyabulēme Kyobe na Mutyika: Mutyika otukwete nao kintu umwekanga divule mu muswelo otwipānina ku kintu’kya na mutyima tō. Bine, tudi na dyese dya kupa Yehova kitatyi kyetu ne bukomo bwetu mwanda wa kumutendela! (Ef. 5:16, 17) Muswelo otwingidija kitatyi kyetu o ulombola amba tumwene bintu bya ku mushipiditu bu bya mvubu kutabuka bya ku ngitu. Nanshi byotudi na kyabulēme kya kwiabila na bakwetu, twibasapwilei’kyo na kyanga ne kwibalombola myanda miyampe kitatyi kyonso kyotumona mukenga.
4 Kyabulēme kya mvubu kekikalangapo divule kifibwa, ino kikalanga kilombolwa bakwabo amba nabo basangele’kyo. Shi netu tumwene mwingilo wetu bu kyabulēme, nabya ukayukana bininge umbūmi bwetu. (Mat. 5:14-16) Nanshi, na mutyima wa kufwija’ko, twendelelei nyeke na kwiula mutumibwa Polo ne kuboya mukenga o-onso wa kulombola amba binebine tukwete mwingilo wetu na mutyika, mwanda i kyabulēme.