Sanswa Dyese Dyobe dya Mwingilo
1. Le bantu bavule mu ino ntanda bamonanga namani mwingilo wetu wa busapudi?
1 Bantu bavule mu ino ntanda ya Satana bamonanga mwingilo wetu wa busapudi bu “bulembakane.” (1 Kod. 1:18-21) Shi ketutelepo mutyima, uno mumweno munyengakane ukokeja kulengeja kutyumukwa mutyima ne kutyepeja bupyasakane bwetu. (Nk. 24:10; Is. 5:20) I bubinga’ka botufwaninwe kuswila dyese dyetu dya kwikala Batumoni ba Yehova?—Is. 43:10.
2. I kika kinenenwa’mba uno mwingilo i ‘mwingilo ukola’?
2 ‘Mwingilo ukola’: Mutumibwa Polo wātelele uno mwingilo bu ‘mwingilo ukola.’ (Loma 15:15, 16) Lelo uno mwingilo i ‘mwingilo ukola’ namani? Kwipāna mu uno mwingilo kwitwikadijanga bu “bakwingila mīngilo pamo” na Yehova, “Ukola,” ne kulunga kuboko ku kuyukanya buujila bwa dijina dyandi. (1 Kod. 3:9; 1 Pet. 1:15) Yehova umonanga mwingilo wetu wa busapudi pamo bwa ‘kitapwa kya lutendelo,’ o mwanda uno mwingilo udi na mvubu mpata mu butōtyi bwetu.—Bah. 13:15.
3. I bika bilengeja kusapula myanda miyampe kwikale na bulēme bukatampe?
3 Kusapula myanda miyampe kudi na bulēme bukatampe nansha dino dyese byodidi enka na bantu batyetye kete. Bamwikeulu bādi bakusangela uno mwingilo ne bādi bine bakwingila’o biyampe. (1 Pet. 1:12) Inoko, Yehova wetutongele batwe bantu bampikwa kubwaninina, “bibumbe bya dīma,” mwanda wa kwingila uno mwingilo wakutendelwa!—2 Kod. 4:7.
4. I muswelo’ka otukalombola’mba tusenswe mwingilo?
4 Bintu bya Kutangidija Kumeso: Tumwene mwingilo bu ubadilwa mu ‘bintu bya mvubu mikatampe’ mu būmi bwetu, mwanda tusenswe bya binebine dino dyetu dyese. (Fid. 1:10) O mwanda, Twitūdilanga’ko mpangiko yenga ne yenga ya kutambila mu mwingilo. Ñomba wa minjiki usenswe dyese dyandi dya kukaya mu kisumpi kya bakayi, uketeakanya mwanda wa kulumbulula buomba ne kulonga bukomo bwa kutamija bwino bwandi. Mo monka, netu tuketeakanya kumeso kwa kwenda mu mwingilo, mwanda wa tubwanye kusapula “mwanda wa binebine” ne tukalonga bukomo bwa kulumbulula bwetu ‘bwino bwa kufundija.’—2 Tem. 2:15; 4:2.
5. Lelo i bāni basangelanga mwingilo wetu?
5 Kokaleka mumweno wa bantu bavule ukutyumune mutyima. Vuluka’mba kukidi bantu bavule mu wetu mwaba basangela bupempudi bwetu. Inoko, ketukimbangapo kwitabijibwa na bantu. Kintu kya mvubu mpata i muswelo wivwana Yehova, ne kadi umwene na kamweno bukomo botulonga na kininga.—Is. 52:7.