Kusapula Bulopwe—Madyese Malēme
1 Dyuba ne dyuba, midiyala ya bekadi ba ntanda bamwenanga mu mpangiko ya buntu ya Leza ipāna būmi. (Mat. 5:45) Inoko, kudi batye’tu badi na madyese a kufwija’ko Umpangi wabo na kusapula myanda miyampe ya Bulopwe bwa Leza. (Mat. 24:14) Le nobe umwene ano madyese malēme muswelo’ka?
2 Kusapula Bulopwe ko kupa Leza bulēme kadi i kuletela bantu basusulwa na tuvutakanya twa dyalelo ndoe ne lukulupilo. (Bah. 13:15) Kadi i būmi bwa nyeke ku boba betabija uno musapu. (Yoano 17:3) Le kudi kaji nansha mwingilo mukwabo upāna bino byabuyabuya? Mutumibwa Polo wāfwijije’ko pangala pa mwingilo wandi mu muswelo waāingile’o. Bine, wēumwene bu kya bulēme.—Bil. 20:20, 21, 24; 2 Kod. 4:1, 7.
3 Kufwija’ko Pangala pa Madyese Malēme Otudi Nao: Muswelo umo wa kufwija’ko pangala pa madyese a kusapula i kuta mutyima ku kulumbulula mwingilo wetu. Le twikalanga tuteakanya musapwilo ukokeja kutenga mityima ya bemvwaniki betu? Mwene tukokeja kulumbulula manwa etu mu kwingidija Bisonekwa ne mu kulanguluka na bantu? Lelo twingilanga ne pa mfulo mwaba onso otupelwe? Le tubwanya kushilula ne kwendeja bifundwa bya Bible? Pamo bwa bene Kidishitu ba kikōkeji ba pa kala ne ba dyalelo, tudi na mumweno muyampe wa mwingilo kadi tusangedile madyese otupelwe.—Mat. 25:14-23.
4 Kitatyi kyotukolejibwa na bununu, na kubelabela, nansha na makambakano makwabo makomo, tuseñwanga pa kuyuka amba bupyasakane botulonga pa kutambila mu mwingilo budi na mvubu mikatampe. Kinenwa kya Leza kitukulupija amba Yehova ukwete na mutyika bukomo bobe bolonga mu mwingilo wandi, nansha shi bakwenu kebamwene’bopo.—Luka 21:1-4.
5 Kusapula Bulopwe yo nsulo ya kuloelelwa kukatampe. Kaka umo wa myaka 92 wānene amba: “Bine i madyese pa kuvuluka myaka 80 yonaingile mu mwingilo wa Leza—pampikwa kyontompwela! Shi nadi mbwanya kushilula monka būmi, nadi wa kwikala enka na būmi bwa uno muswelo, mwanda na bubine, ‘kanye ka lusa lwa Leza katabukile būmi kulumbuluka.’” (Mit. 63:3) Shi ke pano tukwatei makasa abidi madyese malēme etupele Leza—mwingilo wa kusapula Bulopwe.