Tukwete Madyese Etu Makasa Abidi!
1 Mu bula bwa myaka yonso, Yehova upanga bengidi bandi madyese mavule a miswelo ne miswelo. Kadi upānanga ano madyese pambulwa kubanga luntu lwabo, myaka yabo, nansha ludingo lobadi nalo umbūmi. (Luka 1:41, 42; Bil. 7:46; Fid. 1:29) Le netu tupelwe madyese’ka mu ino myaka?
2 Madyese Amoamo Otupelwe: Tudi na dyese dya kufundijibwa na Yehova. (Mat. 13:11, 15) Dyese dikwabo dyotupelwe i dya kutendela Yehova na milomo yetu ku kupwila. (Mit. 35:18) Shi tubamone mukenga wa kulondolola, nabya tulondololei na kyanga. Mo monka, shi tumona kipindi kyonso kyotupebwa mu kupwila bu dyese, nabya tukapityija’ko senene mungya bukomo bwetu. Le twingilanga nyeke na boba bengila mu kukundula Njibo ya Bulopwe nansha kulongolola’yo?
3 Bantu midiyo ne midiyo beipangulanga shi Leza wivwananga milombelo yabo, ino batwe tudi na dyese dya kutelekwa na Muntu upityile bonso mu diulu ne ntanda. (Nk. 15:29) Yehova kasuku kandi ye utejanga milombelo ya bengidi bandi. (1 Pet. 3:12) Katelelepo mfulo ya buvule bwa misunsa ya kumulomba. Bine, tudi na kyabuntu kya kusangela, ke kulomba “myaka yonso nyeke”!—Ef. 6:18.
4 “Bakwingila Mīngilo Pamo na Leza”: Dyese dilumbuluke dyotudi nadyo i dya kusapula myanda miyampe ya Bulopwe bwa Leza bu “bakwingila mīngilo pamo na Leza.” (1 Kod. 3:9) I mwingilo witupa kuloelelwa ne witutūkija mutyima. (Yoa. 4:34) Yehova kadipo unenwe kupa bantu uno mwingilo, ino shi wibapele’o i pa mwanda wituswele. (Luka 19:39, 40) O mwanda mwine Yehova kapelepo ano madyese enka bantu kamukaya. Boba bengila uno mwingilo ku meso a bantu bafwaninwe kubwanya bisakibwa kampanda bya ku mushipiditu ne kulama’byo. (Is. 52:11) Le tulombolanga amba tukwete ano madyese makasa abidi na kushila uno mwingilo kyaba kikatampe mu mingilo yetu ya mu yenga?
5 Madyese atamba kudi Yehova etupetejanga umbūmi. (Nk. 10:22) Nanshi ketwakipēlulai’o! Wivwane tulombole amba tukwete madyese etu a mingilo makasa abidi, nabya tukasangaja Tata wetu wa mūlu, witupa “byonso byakupanwa bilumbuluke, ne byabuntu bibwane.”—Yak. 1:17.