Mukanda wa Musambo

Basapudi ba Bulopwe Baswedibwe:

Tudi na nsangaji pa kumona kwendelela kumeso kwa mwingilo wa busapudi mu mwaba utalwa na musambo wetu mu mwaka wa mingilo wa 2007! Twafikile muno mu Congo-Kinshasa pa kibalwa kikande kya basapudi 138273 ne bapania ba lonso 10765 mu Kweji 1 wadi’mo. Mu Congo-Brazzaville twafikile pa kibalwa kikande kya basapudi 5406 mu Kweji 4, 2007. Mu myeji mwanda imbajinji ya mwaka wa mingilo wa 2007, twaityile bengidi ba ku Betele bapya 33 mwanda wa kwitukwasha ku Musambo. Tusakilwa banabetu ba kwituma ba bwino mu mingilo palapala, kutabukidila ku bwalamuni.

Kintu kya midiyo 8 ya Misapu ya Bulopwe No. 37 inena’mba “Mfulo ya Bipwilo bya Bubela Ibafwena!” yaabanibwe mu mwaba wa musambo wetu onso. Malapolo amo alombola amba bantu pa kupwa kutambula ne kutanga uno musapu, bafwijije’ko Batumoni ba Yehova pangala pa uno musapu webaputwile mu meso. Bajingulwile amba i kya kamweno kuyuka kipwilo kya bine. Kadi bavule i bashilule kutanwa ku kupwila ne i betabije kwifunda Bible.

Kitungo kya makampanye na ano i kukwasha bantu ba mityima myoloke bayuke byobya bine bifundija Bible. (Mat. 28:19, 20) Nanshi ponso pomusapula, vulukai kusoneka yense usangela musapu ne kumujokela na kitungo kya kushilula kwifunda nandi Bible ne kwendelela kumeso na boba ‘badi mu ngikadilo mifwaninwe kukamona būmi bwa nyeke.’ (Bil. 13:48) Tudi na nsangaji ya kwingidila nenu pamo mu uno mwingilo wa kamweno kakatampe, kadi tambulai lwimu lwetu lwa buswe bwa Bwine Kidishitu.

Banabenu,

Betele ya Congo-Kinshasa