Mukanda wa Musambo

Basapudi ba Bulopwe Baswedibwe:

Tubashilula mwaka umpya wa mingilo na kipindi kimo kipya kyabundwa mu mwaba wa musambo wetu wa Congo. Mwaba wa musambo wetu pano keudi na bipindi 137 ne madistrike 12.

Twaingile mwingilo wa kutendelwa wa kuteakanya Bitango bya Distrike 92 ne bipimpo 7 mu mwaba wa musambo wetu onso. Bufundiji bwadi bupānwe mu ndimi 11, kubadila’mo ne ludimi lwa batumama, bimo mu mpangiko mīpipijibwe. Tubemufwija’ko banwe banabetu bonsololo, baendele ñendo milampe mwanda wa kukatanwa ku ino mpangiko ya kamweno ya ku mushipiditu.​—Kup. 31:12.

Mu mwaka kunyuma, lūbako lwa Mobo a Kwikala’mo asatu a maetaje abidi abidi lwashilwile mu lubanza lwa Betele mu Kinshasa. Ano mobo akekala na byumba bipya 84. Mwingilo umbajinji wadi wa kūbaka kyalwilo kya kushimikila’po ano Mobo a Kwikala’mo asatu. Kintu kya mantoni 16000 nansha myotoka 1000 miyule bā ya lubweyele yamwangilwe’po, lwalebelwa ne kukomenwa mwa kwadila kyalwilo kya kūbaka’po.

Bobaki ba kufutwa ba muno mwetu bo bobaka ano mobo mapya a kwikala’mo. Kitango kya Lūbako kya Betele kyo Kikontolola Buya bwa byonso byūbakwa. Kudi kwingidila pamo kuyampe na bobaki ba kufutwa. Mwingidi wabo umo wanene amba: “Kino kifuko kya lūbako i kishile na bikwabo. Bantu ba kuno kwenu betwimunanga nyeke, kadi ne bemaniji benu bene bemunanga bengidi betu bonso, kintu kekilongekangapo pa bifuko bikwabo byotubakanga.” Mukwabo nandi wanene amba: “Bine, Leza udi nenu mwanda mu bitatyi bibi byotwadi tūbaka kino kyalwilo muno mu Kinshasa, mvula kadipo unoka dingi dingi mwanokelanga.”

Mwingilo wa matafwadi ne wa kusambakanya biloba wendelela kumeso mungya mobitandikilwe. Mu kitatyi kitungwe, ano Mobo a Kwikala’mo asatu poasa kupwa, kisaka kya Betele kya mu Kinshasa kisa kukumbanibwa biyampe mwa kwingidila banabetu bonso ba mu budimi bwa Congo. Tufwija’ko pangala pa ino mingilo yonso ya bupyasakane ya kwendeleja tumweno twa Bulopwe kumeso! Kadi tufwija’ko ne bukwashi bobe bwa kyabuntu kya lupeto pangala pa uno mwingilo. (Nk. 3:9, 10) Tulomba Yehova etwesele pa bukomo botulonga mwa kimo mwanda wa “twikale ba kumutendela ne kumutumbija.”​—Ef. 1:​12, MB.

Banabenu,

Bilo ya Musambo wa Congo