Nimelo ya pa Bula ya Réveillez-vous ! ya Kupāna mu Kweji wa 11!
1 Bavule bepangulanga pampikwa budimbidimbi bipangujo pa mwanda utala mvubu ya Bible. Shi i bantu bāmulembele, kyaityilwa bu Kinenwa kya Leza i kika? Le i buluji’ka bwa kumukulupidila’mba aye ye wa kuludika matabula etu? Shi natange Bible ne kwifunda’ye, le kyonkamwena mu kitatyi ne bukomo byonjimija i kika? Le i bwalamuni’ka bwa Bible bomfwaninwe kwingidija? Bino i bipangujo bimobimo bilondolwelwe mu nimelo ya pa bula ya Réveillez-vous ! wa Kweji 11, udi na mutwe wa mwanda unena’mba Pouvez-vous avoir confiance en la Bible ? (Le Ukokeja Kukulupila mu Bible?)
2 Tusaka kusambakanya bininge ino nimelo ya pa bula ya Réveillez-vous ! mu mwaba wetu. Shi bibwanika, tambila mu mwingilo wa ku njibo ne njibo pamo na kipwilo mu Dya Mposo ne Dya Mposo dya Kweji 11. Lombola ino nimelo balongo bobe, balondakani, bengidi nobe, badimu, befundi nobe, ne bantu bopempulanga. Sela’ko amo pa kukapota bintu ne poenda mu lwendo. Bakulumpe i balombele’ko makwabo mwanda wa kipwilo kikale na buvule bubwane senene.
3 Shilula Kifundwa kya Bible: Shi ubapāna dino dipepala, ukokeja kwala mwadijo wa kifundwa kya Bible kumeso kwa kufudija mīsambo yenu. Kimfwa, ukokeja kunena’mba, “Ponsa kwiya dikwabo, nsa kukulombola malondololo a Bible pa kino kipangujo, ‘Le Leza i mukwatyile ino ntanda mpango’ka?’” Kupwa jokela’ko na dibuku Bifundija Bible ne kulombola mwisambi nobe paje wa 4-5, nansha kwisambila pa musango 1-3 mu shapita wa 3. Pakwabo ukokeja kunena’mba, “Dikwabo, tusa kwiya kwisambila pa bupolofeto bwa mu Bible bufikidila’nka mu ano etu mafuku.” Pa kujokela’ko, lombola mwisambi nobe shapita wa 9 mu dibuku ne kubandaula nandi pamo musango 1-3. Nansha ukokeja kusapwila’tu mwisambi nobe amba: “Bantu bavule bakolelwanga kwivwanija byobya byobatanga mu Bible. Difuku dikwabo nsa kwiya kukulombola muswelo okokeja kwivwanija Bible senene.” Pa kujokela’ko, mutweje mu dibuku Bifundija Bible, ne kumulombola mwifundilwanga.
4 I enka Bible kete udi na “bisonekwa bikola” bikokeja kwitupa “ñeni ya ku lupandilo.” (2 Temote 3:15) Nanshi, batwe bonso tufwaninwe kwabanya na bupyasakane ino nimelo ya pa bula ya Réveillez-vous ! mwa kukwashisha bantu bakulupile bininge mu Bible!