Tulumbululei Manwa Etu mu Mwingilo—Na Kulombola Mupityilanga Kifundwa kya Bible na Dibuku Bifundija Bible

Kyokwikadile na Mvubu: Bantu bavule kebevwanijangapo kitatyi kyotunena amba twifundanga na bantu Bible ku bitupu ku mobo abo. Babwanya padi kulanga amba bafwaninwe kukelunga ku kifundwa kya kisumpi nansha bufundiji kampanda bwa ku mikanda. Pa kyaba kya kumunena kala mwifunde, ubulwe’po kumulombola mupityilanga kifundwa? Mu minite’tu mityetye, nansha’tu pa kibelo, ubwanya kulombola muntu mokikadile kipēla kadi kya mvubu kwifunda Bible.

Mwa Kulongela:

Pa kupwa kwitela, ipangula mwisambi nobe shi mutyima wandi umudi kulu pa būmi bwandi bwa kumeso.
Mulombole amba bakwabo nabo badi na mityima kulu pa uno mwanda, ne kumufunkila kifunka kya mu dibuku Bifundija Bible. Mushintulwile amba dino dibuku didi na bifundwa bipēla bilombola byobya bifundija Bible pa mafuku a kumeso ne pa myanda mikwabo, ne kumwipangula shapita umusangaja.
Mutambike dibuku dimo ne kumutwala pa shapita waatonga. Mushintulwile amba bipangujo bidi ku ñanjilo kwa shapita’bi i bilondololwe mu misango ilonda’ko.
Lomba mwisambi nobe atange musango umbajinji shi kebimukolejapo. Ebiya tanga kipangujo kya musango’wa, ne kukimba pamo nandi kilondololwa. Talai ne kwisambila pa bisonekwa bibingija kilondololwa. Mulombole moshikīle kilondololwa mu dibuku dyobe.
Bandaulai musango ulonda’ko, ino pano, nena mwisambi nobe alondolole mu bishima bya aye mwine.
Mufwije’ko, ne kwilaya kwimona monka mwanda wa kupwa kifundwa.
Shi bibwanika, kokela milangwe yandi ku video idi pa jw.org inena’mba, I Bika Biloñwanga mu Kifundwa kya Bible?

Tompa Kulonga Namino Uno Kweji:

Lomba Yehova akwesele polonga bukomo bwa kushilula kifundwa kya Bible.—Fid. 2:13.
Tompa kulombola muntu kifundwa kya Bible na kwingidija dibuku Bifundija Bible, nansha kumutadija video inena’mba, I Bika Biloñwanga mu Kifundwa kya Bible? nansha dimo’tu poenda mu busapudi.