Lelo Wamutompeje Mwifundilwanga Pomwetene Dibajinji?
Bantu bamo potwibanena kwifunda nabo Bible, banenanga amba kebaswele, nansha amba befundanga kala Bible ku kyabo kipwilo. Byobadingakanyanga mulangwe wa kwifunda Bible na byobayukile kala, o mwanda kebalañangapo bubinebine ne nsangaji yobabwanya kumwena’mo. Nanshi pa kyaba kya kulombola bitupu muntu efunde Bible, wabulwa’po kumutompeja bidi mwifundilwanga Bible mu kwitana kwenu kubajinji? Tulete kimfwa: Kokalombola muntu bitupu amba ndyukile kutēka biyampe ne kumulaya amba nkakuletela bidibwa difuku dikwabo; mutompeje’mo ponka na ponka! Tala muswelo okokeja kwikilonga mu minite mityetye’tu, na kulonda milangwe idi pa paje 6 mu Mwingilo Wetu wa Bulopwe wa Kweji 1, 2006:
“Molangila, lelo kudi difuku’tu dikafikidila bino binenwa bino? [Tanga Isaya 33:24, kadi muleke alondolole.] Nsaka nkulombole kintu kimo kisangaja pa uno mwanda.” Tambika mwisambi nobe dibuku Bifundija Bible, wisambile pa musango 22 pa paje 36. Tanga kipangujo kunshi kwa dyani, ne kumunena akimbe malondololo pomutanga musango. Kupwa mwipangule monka, ne kuteja byasa kunena. Tangai nandi ne kisonekwa kikwabo. Mwipangule kipangujo kikalondololwa pa kwitana dikwabo, ne kwilaya difuku dya kwitana monka. Kubapu, ubashilula kifundwa kya Bible!