Tufwaninwe Kulama Bupyasakane Bwetu mu Mwingilo
1 Mwaka ne mwaka tamba mu 1992, Batumoni ba Yehova bapityijanga nsaa mudiyo umo ne musubu mu mwingilo wa kusapula Bulopwe ne kulonga bana ba bwanga. Bine tudi na nsangaji kashā pa kulunga netu kuboko ku uno mwingilo mukatampe!—Mat. 28:19, 20.
2 Ino na bubine, wa kufwija’ko ne wa kutendelwa mwine i Yehova, mwanda ye witukwatakanyanga mu mwingilo wetu mu ino “myaka ya malwa.” (2 Tem. 3:1) Lelo i bika bitulombwa shi tusaka kwendelela kwingila na bupyasakane mu uno mwingilo wa mvubu?
3 Kine kya Kwitupa Bupyasakane: Buswe bukatampe botuswele Leza ne mukwetu, kubadila’mo ne mutyima wa kwikala na būmi bukwatañane na kwipāna kwetu, bo bwitutonona twingile mingilo ya Bulopwe. (Mat. 22:37-39; 1 Yoa. 5:3) Buswe bwitupanga mutyima wa kwipāna mwa kwingidila ne pa mfulo mwingilo wa busapudi.—Luka 9:23.
4 Longa Buninge bwa Kulama Bupyasakane: Dyabola walwana netu uloñanga bukomo bwandi bonso mwanda wa kutyimpila panshi bupyasakane bwetu mu mwingilo. Buñumauma bwa bantu badi mu mwaba wetu, bilabi bya ino ntanda, mitabakano yotutana difuku ne difuku umbūmi, ne kusela kotusela mutyima kūlu pangala pa misongosongo i miswelo imo bidi yaingidijanga mwanda wa kwituzozeja.
5 Nanshi, tufwaninwe kulonga buninge shi tusaka bupyasakane bwetu bwikale nyeke bukabe. I kipite buya tutamije ‘buswe bwetu bubajinji.’ Kino kilomba kutanga ne kulangulukila nyeke pa Kinenwa kya Leza, Bible, ne kulonda mpangiko yonso ya ku mushipiditu itūdilwe’ko na “umpika wa binebine, udi na manwa.”—Kus. 2:4; Mat. 24:45; Mit. 119:97.
6 Difuku dya Yehova dya konakanya bantu bampikwa bwine Leza dibafwena, pamo na mwikilombwela patōka bupolofeto bwa mu Bible. (2 Pet. 2:3; 3:10) Byotuyukile kala kino, tulongei nanshi buninge bwetu bonso bwa kulama bupyasakane bwetu mu mwingilo na kwingila ne pa mfulo mwingilo wingilwa dyalelo wa kusapula Bulopwe ne kulonga bana ba bwanga!