Lelo Ukeula Bupyasakane bwa Yehova ne bwa Yesu Kitatyi kya Kivulukilo?

1. Lelo i bukomo’ka bwa pabula buloñanga Batumoni ba Yehova kitatyi kya Kivulukilo?

¹ Yehova ufikidijanga mpango yandi na bupyasakane. Isaya 9:7 wisambila pa madyese akaleta Bulopwe bwa Leza’mba: ‘Bupyasakane bwa Yehova wa bibumbo bukafikija kine kino’ki.’ Mu muswelo umo onka, Mwanā Leza, mu mwingilo wandi wa pano pa ntanda, wālombwele bupyasakane pangala pa butōtyi bwa bine. (Yoa. 2:13-17; 4:34) Mwaka ne mwaka, kitatyi kya Kivulukilo, basapudi midiyo ne midiyo baloñanga bukomo bwa pa bula bwa kwiula bupyasakane bwa Yehova ne bwa Yesu na kutandabula mwingilo wabo. Lelo nobe usa kubadilwa’mo?

2. Le bupyasakane buketutonona tulonge bika kushilwila mu mafuku 7 Kweji 3?

² Kampanye ka Kivulukilo: Kampanye ka uno mwaka ka kwita bantu ku Kivulukilo kakashilula mu Dya Mposo, mafuku 7 Kweji 3. Nobe Kwata mpangiko tamba’nka pano ya kutambila mu mwingilo na bupyasakane. Bipwilo bikekala na nsangaji mikatampe ya kusapula mu mwaba wabyo onso. Longa bukomo bobe bonso bwa kwita bantu bowifundanga nabo Bible, bojokelanga’mo dipya, bomwingilanga nabo, babutule, ne bakwenu ba ku masomo na kwibapa kakanda ka lwito nansha na kwibakokela pa diteba jw.org.

3. I muswelo’ka otubwanya kutandabula mwingilo wetu mu Kweji 3 ne Kweji 4?

³ Bupania Mukwashi: Kadi bupyasakane buketutonona tutandabule mwingilo wetu. Tukulupile amba bavule bakengila bupania mukwashi mu Kweji 3 ne Kweji 4, mwanda tukidi na mukenga wa kwingila na kitungo kya mansaa 30. Mu kifundwa kyenu kya kisaka nansha kifundwa kya pa kasuku, elai uno mwanda ne mu milombelo ne kulanga mwa kwingidila’bo. (Nki. 15:22) Muswelo okankamenine kano kampanye ukakankamika bakwabo nabo bengile uno mwingilo na bupyasakane. Shi ukwate mpangiko ya mwa kwingidila bininge, nabya ukeula bupyasakane bwa Yesu.—Mako 6:31-34.

4. Le i madyese’ka atamba mu kwiula bupyasakane bwa Yehova ne bwa Yesu?

⁴ Kwiula bupyasakane bwa Yehova ne bwa Yesu kitatyi kya Kivulukilo kuketuletela madyese mavule. Bantu bavule mu mwaba bakasapwilwa. Tukemwena nsangaji ne kuloelelwa kutamba mu kwingidila Yehova ne nsangaji ya kupāna. (Bil. 20:35) Ne kintu kya mvubu kutabukididila, tukasangaja Leza wetu wa bupyasakane ne wandi Mwana.