Lelo Usa Kwingila bu Pania Mukwashi?
1. Mwanda waka kitatyi kya Kivulukilo i kitatyi kiyampe kya kutandabula mwingilo wetu?
1 Kitatyi kya Kivulukilo i kitatyi kiyampe kutandabula mwingilo wetu. I kitatyi kyotulangulukilanga pa buswe bukatampe bwa Yehova pa kupāna wandi Mwana bu kikūlwa. (Yoa. 3:16) Kino kitamijanga mutyima wetu wa kufwija’ko, ne kuningija kyumwa kya kusapwila bantu myanda itala padi Yehova ne pa byalongela bantu. (Is. 12:4, 5; Luka 6:45) Kadi i kitatyi kyotuloñanga kampanye ka kwitaba boba botwiyukile nabo ne bantu ba mu mwaba wetu bāye ne ku Kivulukilo. Kupwa, tuloñanga bukomo bwa kutamija kusangela kwa boba batenwe’ko. Lelo usa kutandabula mwingilo obe na kwingidila bu pania mukwashi mu Kweji 3, 4, nansha 5?
2. I bika bilengeje Kweji 3 ekale wa pa bula mu bupania mukwashi?
2 Kweji 3 Ekale wa pa Bula Kodi: Kweji 3 ukekala kweji muyampe kwingila’mo bupania mukwashi. Boba bakalomba’bo bakokeja kukengila bwa mansá 30 nansha 50. Shi mukapempulwa na mutadi wa kipindi kweji’wa, boba bengila bu bapania bakwashi bakokeja kukatanwa ku lenyo yonso mituntulu na bapania ba lonso ne ba pa bula. Kampanye ka kwita bantu ku Kivulukilo kya mu Dya Bubidi, mafuku 26 Kweji 3, 2013, i kalepejibwe kupita’ko myaka kunyuma, mwanda kakashilula uno mwaka mu difuku 1 Kweji 3. Ne kadi, Kweji 3 ukekala na mayenga atano. Le ubulwe’po kwibandaula shi ubwanya nobe kulonga uno kweji ekale wa pa bula uno mwaka?
3. I muswelo’ka otubwanya kutandabula mwingilo wetu?
3 Alwila’ko: Kino kyo kitatyi kya kubandaula mpangiko yobe ne kutala i pepi pa kushinta mwa kwingidila bupania. Kisaka kikokeja kukwasha’ko, o mwanda mwilamijei’ko kitatyi mu Butōtyi bwa Kisaka bwa kyolwa amba mwisambile pa mingilo ya kisaka ne kukwata mpangiko. (Nk. 15:22) Shi kubwanyapo kwibwingila, nabya kokatyumukwa mutyima. Le ubulwe’po kubweja’ko kitatyi kya kusapula difuku dyonso dyotamba? Kutalula’mo mafuku osapulanga, le ubulwe kutentekela’po dikwabo mu yenga?
4. I byabuyabuya’ka byotukemwena shi tutandabule mwingilo wetu mu Kweji 3, 4, ne 5?
4 Shi tutandabule mwingilo wetu mu Kweji 3, 4, ne 5, nabya tukatandabula nsangaji ne kuloelelwa bilupuka mu kwingidila Yehova ne mu kupāna. (Yoa. 4:34; Bil. 20:35) Kadi kutabukidila, bukomo bwetu bwa kwipāna bukasangaja Yehova.—Nk. 27:11.