Longa Kino Kitatyi kya Kivulukilo Kikale kya Nsangaji!
1. Le i muswelo’ka umo wa kuvudija nsangaji yetu kitatyi kya Kivulukilo?
1 Le usaka kuvudija nsangaji yobe mu Kweji 3, Kweji 4 ne Kweji 5? Muswelo umo bidi wa kulonga namino i na kutandabula mwingilo obe, shi bikokejika na kwingila bupania mukwashi. Le kino kikabweja’ko nsangaji yobe namani?
2. Lelo kutandabula mwingilo wetu kubwejanga’ko nsangaji namani?
2 Vudija Nsangaji Yobe: Yehova wetupangile na bukomo bwa kwimwena nsangaji ne maloa potumutōta na kuvuija bisakibwa byetu bya ku mushipiditu bya kibutwila. (Mat. 5:3) Kadi wetupangile mu muswelo otubwanya kusokola nsangaji itamba ku kupāna. (Bil. 20:35) Mwingilo wa busapudi witukwashanga tufikile pa bino bintu byonso bibidi—kutōta Leza ne kukwasha bakwetu. Nanshi i kyendele’mo tunene amba kutandabula mwingilo wetu wa busapudi kuletanga nsangaji mivule. Kadi shi tusapula bininge, bwino nabo bukavudila’ko. Shi twikale na bwino, nabya tukekulupila kadi tukatalula moyo. Tukekala na mikenga mivule ya kusapula bukamoni ne kushilula bifundwa bya Bible. Bino byonso bilengejanga mwingilo wetu wikale wa nsangaji nakampata.
3. I kika kinenenwa amba Kweji 3 ne Kweji 4 i myeji miyampe mpata kwingila bupania?
3 Kweji 3 ne Kweji 4 ikekala myeji miyampe mpata ya kwingila bupania mukwashi mwanda tubwanya kutonga kwingila mansá 30 nansha 50. Kadi kushilwila mu Dya Mposo, mafuku 22 Kweji 3 kutūla ne ku Kivulukilo kikalongwa mu Dya Mwanzo, mafuku 14 Kweji 4, tukalonga kampanye ka nsangaji ka kwita bantu bakwabo nabo bāye batanwe ku Kivulukilo. Bipwilo bikekala na nsangaji pa kumona bantu bavule bengila “ne mutyima umo” mwanda wa kusambakanya mwaba onso pa kitatyi kitungwe.—Zef. 3:9.
4. Le i bika byotufwaninwe kulonga shi tusaka kwingila bupania mukwashi?
4 Witeakanye Tamba’nka Pano: Shi kwalongele namino, nabya wilamije’ko kitatyi kya kubandaula monka mpangiko yobe ne kumona i bika byofwaninwe kujadika mwanda wa kutandabula mwingilo obe mu kweji umo nansha myeji mivule. Ela’byo mu milombelo. (Yak. 1:5) Lombola’mo ba mu kyenu kisaka ne bakwabo ba mu kipwilo. (Nki. 15:22) Ukamona’mba nansha shi udi na bikoleja bya bukomo bwa ngitu nansha shi wi muvudilwe mingilo, nobe ubwanya kwimwena nsangaji idi mu kwingila bupania mukwashi.
5. Le i bika bikalupuka ku kutandabula mwingilo wetu mu kino kitatyi kya Kivulukilo?
5 Yehova usaka bengidi bandi bekale mu nsangaji. (Ñim. 32:11) Shi tutakamane mu kutandabula mwingilo wetu mu kino kitatyi kya Kivulukilo, nabya tukavudija nsangaji yetu, kadi tukasangaja Tata wetu wa mūlu.—Nki. 23:24; 27:11.