Witeakanye Mwa Kutandabwila Mwingilo Obe
1. Le i mwanda’ka wa mvubu ulongekanga mu kitatyi kya Kivulukilo, ne tuketeakanya’ko namani?
1 Kitatyi kya kivulukilo kitupanga mukenga wa ‘kufwija Yehova’ bikatampe. (Mit. 109:30) Lelo ubulwe’po kutandabula mwingilo obe mu Kweji 3 mwanda wa kufwija’ko Yewa wāpēne kikūlwa? Kino kyo kitatyi kya kushilula kwiteakanya.—Nk. 21:5.
2. Lelo abe ne bakwabo mwalongele namani patyepejibwe kibalwa kya nsaa ya bupania mukwashi mu Kweji 4 wapityile’u?
2 Kwingila bu Pania Mukwashi: Mwaka wapityile bipwilo byasangele pa kwimvwana amba mu Kweji 4 kudi mpangiko ya kwingila bu pania mukwashi bwa mansaa matyetye. Tutu umo walembele amba: “Ngidi ku inivelesite, ne byadi bikomo ami kwingila bu pania wa kitatyi kyonso. Ino pano nsa kulomba bupania bwa mansaa 30 ino neelele’ko kufikila pa mansaa 50 mu Kweji 4.” Kaka umo udi na kaji ka nshikije-dyuba, walembele amba: “Nsa makumi asatu? Ī, yayo ipēla!” Pobaelele uno musapu, kaka umo wadi pania mafuku kunyuma, pano udi kādi na myaka 80 ne musubu, wanene amba: “Mwene kino kyo kitatyi kyonadi ntengele kadi! Yehova wadi uyukile amba kwingila bu pania kyadi kitatyi kilumbuluke’po kashā mu bwami būmi!” Boba kebabwenyepo kwingila bu bapania bakwashi betungile kusapula bininge.
3. Le i mikenga’ka ikalengeja bantu bengile bupania mukwashi mu Kweji 3, 4, ne 5?
3 Kweji 3 nandi ukekala kweji mulumbuluke wa kwingila bupania mukwashi, mwanda tukekala monka na dyese dya kutonga kwingila mansaa 30 nansha 50. Kadi, tukalonga kampanye ka pa bula kakashilula mu mafuku 17 Kweji 3 ka kwita bantu bāye ku Kivulukilo kikalongeka mu mafuku 5 Kweji 4. Bavule bakasangela kuno kutandabuka kwa mwingilo wabo kukebalengeja ke basake kwingila bupania mu Kweji 4 ne mu Kweji 5 bwa mansaa 50 alombelwe.
4. Le tukatandabula namani mwingilo wetu, ne i bika byotukamwena’mo?
4 Le mubulwe’po mu Kifundwa kya Kisaka kya ku kyolwa kwisambila pa muswelo ukokeja muntu ne muntu mu kisaka kutandabula mwingilo wandi mu kitatyi kya Kivulukilo? (Nk. 15:22) Lomba Yehova esele bukomo bobe. (1 Yoa. 3:22) Shi utandabule mwingilo obe wa busapudi, ukatumbija mpata Yehova, kadi ukavudija ne nsangaji yobe.—2 Kod. 9:6.