Kitatyi kya Kivulukilo—Mukenga Muyampe wa Kutandabula Mwingilo!
1. I bubinga’ka botudi nabo bwa kubandaula kutandabuka kwa mwingilo wetu mu Kweji 3, Kweji 4, ne Kweji 5?
1 Ubulwe’po nobe kutandabula mwingilo obe mu kitatyi kya Kivulukilo kilonda’ko’ki? Mu bifuko bivule, kūlu kukekala kuyampe mu bino bitatyi ne mansaa mavule mwinya. Basapudi bamo bakekala mu konje ku kaji nansha ku masomo, ne kino kikebapa mukenga wa kusapula. Tamba mu mafuku 2 Kweji 4, tukekala na kampanye ka pa bula ka kwita boba basangela musapu baye batanwe netu ku Kivulukilo kikalongwa mu mafuku 17 Kweji 4. Kupwa, tukalonga bukomo bwa kutamija kusangela kwa boba batenwe’ko ne kwibeta ku dishikulu dya pa bula dikanenwa mu yenga wa mafuku 25 Kweji 4. Bine, tudi na bubinga buvule bwa kubandawila kutandabuka kwa mwingilo wetu mu Kweji 3, Kweji 4, ne Kweji 5.
2. Lelo i muswelo’ka muyampe wa kutandabula mwingilo wetu?
2 Kwingila bu Pania Mukwashi: Muswelo umo mulumbuluke wa kulonga bivule mu mwingilo i wa kwingila bu pania. Nansha batwe bonso byotuvudīlwe bya kulonga, divule dine kino kilomba kutandika mpangiko kumeso kwa kitatyi ne kwiijadika. (Nk. 21:5) Padi ukokeja kuleka mingilo imo-imo yampikwa mvubu mu mingilo yobe ya bukile bukya. (Fid. 1:9-11) Ubulwe’po kulombola bakwenu mu kipwilo mutyima obe wa kwingila bu pania, amba nabo bamone shi babwanya kwilunga nobe mu mwingilo wa bu pania mukwashi?
3. Lelo bisaka bikatandika mpangiko namani mwanda wa kwingila bininge?
3 Bikekala biyampe mwisambile pamo na kisaka pa bitungo byenu, mu Butōtyi bwa Kisaka bwa kyolwa bulonda’ko. (Nk. 15:22) Shi mwingidila pamo, padi muntu umo nansha bavule mu kisaka babwanya kwingila bu pania mukwashi mu kweji umo nansha myeji mingi. Le bikekala namani shi mubamone amba kebibwanikapo? Padi kisaka kikokeja kutandika nyeke mpangiko ya kutandabula mwingilo, na kusapula byolwa bimobimo nansha kwija’mo bininge mu ma Dya Mposo ne Dya Yenga.
4. I madyese’ka akalupuka ku kutandabula mwingilo wetu wa busapudi mu kino kitatyi kya Kivulukilo?
4 Yehova umwene byonso byotulonga mwanda wa kumwingidila kadi usangelanga kwipāna kwetu. (Bah. 6:10) Nsangaji itambanga ku kupāna kudi Yehova ne bakwetu. (1 Bil. 29:9; Bil 20:35) Lelo ubulwe’po kutandabula mwingilo obe mu kitatyi kya Kivulukilo ne kwangula nsangaji ne madyese mavule alupuka’ko?