“Ikalai ne Mutyima wa Kutunta”
1. Lelo busapudi bwetu bufwaninwe kusapulwa namani?
1 I kutupu mwingilo mu mingilo ya Bwine Kidishitu ufwaninwe kwikala bitupu. Ino twi basoñanibwe amba: “Ikalai ne mutyima wa kutunta pa kwepa ya bupika bwa Mfumwetu.” (Loma 12:11) Ino kudi bintu bivule bikokeja kutyepeja bupyasakane bwetu mu mingilo. Lelo i muswelo’ka otukokeja ‘kupuja pamo bwa mudilo’ bupyasakane ne buzanzamuke bwetu mu mwingilo wa Bulopwe?—2 Tem. 1:6, 7.
2. Lelo kifundwa kya Bible kya kasuku kikwatañene namani na bupyasakane bwa mu mwingilo?
2 Kifundwa kya Bible kya Kasuku: Musapudi wa Bulopwe muyuke’byo i muntu usenswe bijila bya Leza ne kutengwa mpata na bubinebine butanwa’mo. (Mit. 119:97) Kitatyi kyotutana bupeta bwa mu Bible kupityila ku kifundwa kya kasuku, kino kipujanga mutyima wetu ne kuvudija bupyasakane bwetu. Kusanswa Mwine upāna buno bubinebine ne mutyima wetu wa kusapwila bakwabo myanda miyampe, bitutononanga tutendele Leza ne kusapula dijina dyandi ku bantu bonso. (Bah. 13:15) Kibamweka amba, kusapula myanda miyampe na kininga kulombolanga motukwatyile’yo na bulēme.
3. Lelo mushipiditu wa Leza witukwashanga namani mu mwingilo?
3 Lombai Mushipiditu wa Leza: Mwingilo upa bipa keuvuijibwapo na bukomo bwa batwe bene. Bupyasakane bwa binebine butambanga ku mwingilo wa mushipiditu wa Leza. (1 Pet. 4:11) Kufwena kudi Nsulo ya “bukatampe bwa bukomokomo” kuketupa bukankamane bwa ku mushipiditu bwa kusapula na kininga. (Is. 40:26, 29-31) Kitatyi kyātenwe mutumibwa Polo na lwana mu mwingilo wandi, wāikele “kutambula bukwashi bwa Leza.” (Bil. 26:21, 22) Mushipiditu sandu wa Yehova upāna bukomo ukokeja kwitukwasha twikale ba kutunta mu mwingilo wetu, nanshi tufwaninwe kwiulomba.—Luka 11:9-13.
4. Lelo bupyasakane bubwanya kulupula bipa’ka biyampe, inoko tunenwe kudyumuka bika?
4 Bupyasakane butēma mudilo bwa kusapula Bulopwe, divule bukabijanga bininge bupyasakane bwa banabetu Bene Kidishitu. (2 Kod. 9:2) Bantu bavule mu mwaba, betabijanga musapu upānwa na buzanzamuke ne kusumininwa. Inoko, bupyasakane bufwaninwe nyeke kwendela pamo na bunwa ne butūkanye. (Tet. 3:2) Kitatyi kyonso, tufwaninwe kulēmeka mwisambi netu ne bwanapabo bwandi bwa kwitongela.
5. Lelo i musoñanya’ka wa ku mushipiditu otufwaninwe kwielela’ko kulonda?
5 Byotudi basapudi ba Bulopwe, twikalei nyeke na “mutyima wa kutunta.” Tutamijei bupyasakane kupityila ku kifundwa kya Bible kya kasuku ne kulomba Yehova na mutyima umo, aye ukokeja kwitupa bukomokomo bwa mushipiditu sandu. Mu uno muswelo, tukabwanya kuvuija na bupyasakane mwingilo wetu “mu Mushipiditu Sandu, ne mu kusumininwa byamalwa.”—1 Tes. 1:5.