Kampanye Kakatampe ka Busapudi Kekalongelwe Kashā Pano pa Ntanda!
Pano ke myaka 100 ne musubu, Batumoni ba Yehova kasha balongololwa mwanda wa kusapula myanda miyampe. (1 Kod. 9:23) Tubanena’mba i kampanye kakatampe ka busapudi kekalongelwe kashā pano pa ntanda mwanda pano tusapulanga uno musapu mu ndimi tutwa na tutwa. Twiusapulanga mu matanda 230 ne kupita. (Mat. 24:14) Ino mwanda waka uno mwingilo i wa mvubu? Ne wingilwanga muswelo’ka ntanda yonso?
Video inena’mba Les Témoins de Jéhovah : organisés pour prêcher la bonne nouvelle ilondololanga bino bipangujo na kushintulula kamo ne kamo bipindi palapala bya mu mwingilo wetu wingilwa mu mizo yonso. Ta mutyima ku bino bipangujo potala’yo: (1) Lelo mwingilo wetu ulongololwanga ne kuludikwa namani? (2) Le Mingilo ya Bulembi, Bwalamuni, Busendwe, ne Kukwata Mawi ne Bifwatulo ituntwilanga namani ku kusapula myanda miyampe? (3) Lelo kitungo kine kyotuvudijija bitampilo ne mingilo ya kutuma bintu i kitungo’ka? (Yoa. 17:3) (4) Le i mabuku anga palapala atampwanga mu mwaka umo? (5) Lelo mabuku etu esambila pa Bible i makwashe bantu namani? (Bah. 4:12) (6) Lelo i bika biloñwanga mwanda wa kukwasha boba kebamonepo ne kwivwana biyampe? (7) Lelo lupeto lwingilwa nalo mwingilo wetu lutambanga kwepi? (8) Le Mingilo ya Batala Myanda ya Lupitalo, ya Batala Myanda ya Busapudi, ne ya Batala Myanda ya Bitango idi na kamweno’ka kotudi? (9) Byodi Kamoni wa Yehova, lelo ino video ibatuntwila’ko namani mutyima obe wa kufwija’ko pa mwanda wa (a) bukomo bulonga bulongolodi bwa Yehova pa kusapula myanda miyampe? (b) bisaka 100 ne musubu bya Betele bidi koku ne koku pano pa ntanda? (c) bufundiji bufundijibwa batadi ne bamishonele? (d) mvubu ya kushilula difuku ne difuku na kubandaula kisonekwa kya Bible ne kuteakanya kupwila kwa pa kipwilo yenga ne yenga? (e) kamweno kadi mu kutanwa ku kubungakana kwetu kwa Bwine Kidishitu? (f) byobya byotukamona mu Paladisa? (Is. 11:9) (g) kwingila na bengila mwingilo wa mwangulo ukyendelela ne pano?—Yoa. 4:35.
Le myanda’ka miyampe yowamwene powalombwele ino video ku balunda nobe, bayukane, bantu bojokelanga’ko mu busapudi, ne ku bowifundanga nabo Bible? Ubulwe’po kulombola’yo ne kusapwila bantu bakwabo myanda miyampe pakubulwa kwija?—Mat. 28:19, 20.