Ingidija Senene Kitatyi Kyobe mu Mwingilo
1 Na bubine kudi bivule bya kulonga mu mwingilo wetu, ino kitatyi nakyo kibai. (Yoa. 4:35; 1 Kod. 7:29) Shi twilongolola ne kuteakanya bintu kumeso kwa kitatyi, tukokeja kumona kitatyi kivule kya kupityija mu busapudi mungya mpangiko yetu.
2 Witeakanye: Kumeso kwa kukatanwa ku kupwila kwa kwenda mu mwingilo wa budimi, tadija shi udi na bitabo bifwaninwe ne shi ujingulwile kala mwanda okesambila’po mu mwingilo. Shi kupwila kubafule, ne kupwa milombelo, endelelela mu mwingilo wa budimi kwija mpika. Kino kikakukwasha abe ne boingila nabo kulonga bivule mu kitatyi kyomudi mu mwingilo wa budimi.
3 Shi abakupe kwendeja kupwila kwa kwenda mu mwingilo wa budimi, nabya shilula’ko pa kitatyi. Kupwila kufwaninwe kwikala kwīpi—minite 10 kutūla ku 15. Kumeso kwa kufudija kupwila, umo ne umo ufwaninwe kala kuyuka i kwepi kobakengidila ne i ani wasa kukengila nandi.
4 Podi mu Mwingilo: Papwa’tu kupwila kwa kwenda mu mwingilo wa budimi, kokilejaleja ino shilula kwenda kala mu mwaba ukupelwe. Shi mukasapwile na bakwenu lwa motoka ino usaka kuleka’byo kumeso kwa nsaa, nabya teakanya mwa kujokela bunka pa kyaba kya kukimba kisumpi kyonso kyaluke mu mwingilo kumeso kwa kitatyi. Shi musapula buvule, langila bakwenu bakwilaija uvuye mīsambo yobe na bantu. Kino kikalomba padi kufudija na bwino mīsambo yowisamba na muntu unena bilabila nansha kukwata mpangiko ya kujokela muntu usangedile musapu.—Mat. 10:11.
5 Shi ulonga kujokela’mo, nabya epuka bya kwenda bwendeende ku bantu wadi mu uno mukenza ke mu ou. Padi i biyampe kwita bantu ku telefone ne kuyuka shi badi ku njibo kumeso kwa kwenda’ko. (Nk. 21:5) Ekale umona amba ojokela’mo’wa ukakwijija bininge, nabya lombola boba bomukasapula nabo basapwile dya kubwipi, nansha kwata mpangiko ya kukapempula bangi.
6 Tudi mu kitatyi kya mwangulo mukatampe wa ku mushipiditu. (Mat. 9:37, 38) Panopano ponka uno mwingilo usa kufula. Nanshi kyotusaka i kwingidija senene kitatyi kyetu potudi mu mwingilo.