Le Tukakwasha Namani Boba Bakatanwa ku Kivulukilo?
1. I musapu’ka munane ukapānwa mu mafuku 22 Kweji 3, 2008?
1 Bantu bavule kujokoloka ntanda yonso bakatambula musapu munane mu mafuku 22 Kweji 3, 2008. Boba bakatanwa ku Kivulukilo bakemvwanija buswe bwituswele Yehova pa kwitupa kikūlwa. (Yoa. 3:16) Bakafunda myanda itala Bulopwe ne muswelo ukafikidija Yehova kiswa mutyima kyandi pano pa ntanda. (Mat. 6:9, 10) Bakemwena kizaji kyetu kya kyanga ne bumo budi mu bantu ba Leza.—Mit. 133:1.
2. Tukakwasha namani befundi ba Bible bakatanwa ku Kivulukilo?
2 Befundi ba Bible: Mu bemvwaniki mukatanwa ne bamo bakishilula kwifunda netu Bible. Wibalombole bayuke batutu ne bakaka. Wibashintulwile motupwidilanga mu bula bwa yenga ne kwibanangija pa Njibo ya Bulopwe. Mu bula bwa mwisambo, muneni ukakankamika befundi ba Bible bendelele kumeso. Kadi myanda yakanena’ya, nobe ukokeja kwingidija’yo pa kwibakankamika.
3. Tukakankamika namani basapudi kebakingilanga bakatanwa’ko?
3 Basapudi Kebakingilanga: Bamo bakatanwa’ko i boba kebakingilanga. Longa bukomo bwa kwibemuna na kyanga. Epuka kwibepangula bipangujo bibatala nansha kunena binenwa bibafityija mutyima. Kinondanonda na Kivulukilo, bakulumpe bafwaninwe kukapempula musapudi ye-yense kakingilanga watenwe’ko, bakamufwija’ko ne kumwita āye atanwe ku kupwila kulonda’ko.
4. I muswelo’ka otukakwasha bapempudi betu?
4 Bapempudi: Bamo bakatanwa’ko bakokeja kwikala bayukane ne balongo botwaityile. Bakwabo i boba batambwile lwito mu bula bwa kampanye ka pa bula. Shi ubamone muntu okuyukile, witele dijina ne kumulubula na kyanga. Pamo i musunsa wabo mubajinji kwiya kutanwa ku kupwila. Pomwisamba ukokeja kuyuka kobekalanga mwa kukebapempwila. Tukokeja kutamija mutyima wabo wa kusangela musapu nansha wa kwifunda Bible shi tubakebapempula nansha kwibeta ku telefone pa kupwa kwa Kivulukilo.
5. I bika byotukanena pa kushilula kifundwa kya Bible?
5 Myanda ya mu dishikulu dya Kivulukilo ikokeja kwingidijibwa mwanda wa kulonga kujokela’mo kupya na dibuku Bifundija Bible. Kimfwa, muneni ukatanga Isaya 65:21-23. Penepa mu kujokela’mo kupya ukokeja kwisambila pa dishikulu ne kunena’mba, “Nsaka kulombole madyese makwabo aletelwe na kikūlwa.” Ebiya tala dibuku Bifundija Bible pa paje 4-5. Nansha kadi ubwanya kunena’mba, “Bavule beipangulanga i kitatyi’ka kikafikidila bupolofeto bwa Isaya.” Talai musango 1-3 mu shapita 9. Muswelo mukwabo upēla i kutela byanenene muneni, kupwa wamupa dibuku Bifundija Bible ne kumushintulwila muswelo wa kwifunda.
6. I mikenga’ka yotukekala nayo shi tukōkele musoñanya wa kuvuluka lufu lwa Yesu?
6 Nanshi batwe bonso tukimbei mikenga ya kukwasha befundi ba Bible, basapudi kebakingilanga, ne bapempudi bakatanwa ku Kivulukilo. (Luka 22:19) Bine, Yehova kakabulwepo kwitwesela penda pavudila’ko mwingilo wa Bulopwe.