Wibatundaile!
1. I kitatyi’ka kyotudi na mukenga mulumbuluke wa kupāna bukamoni, ne mwanda waka?
1 Twikalanga na mukenga wa pa bula wa kupāna bukamoni kitatyi kya Kivulukilo kya mwaka ne mwaka. Tá mutyima: Uno mwaka tutengele na kipyupyu kintu kya bantu midiyo dikumi ne kupita baye batanwe netu ku Kivulukilo mwanda wa kwivwana miswelo ibidi mikatampe ya buswe, yālombwelwe patōkelela kupityila ku kikūlwa. (Yoa. 3:16; 15:13) Bakefunda kuyuka bya buyabuya byobakokeja kumona kupityila ku kya buntu kya Yehova. (Is. 65:21-23) Inoko, ke’nkapo muneni kete ukapāna bukamoni mu dino difuku. Uno i mukenga ku bemvwaniki bonso wa kupāna bukamoni mu dino difuku ku bapya na kwibatundaila na kyanga.—Loma 15:7.
2. I muswelo’ka otukokeja kutundaila bapya na kyanga?
2 Kumeso kwa mpangiko ishilule i biyampe kwiimuna ne kwiyuka na bomushikete nabo pa kyaba kya kufika koshikete bunka. Bapya bamo bakokeja kwikala ba mashika mashika mwanda kebayukilepo senene mobisa kupityila. Mimungomungo yetu, ne lwimu lwa kyanga bikebapwa’ko mashika amo. Shi usaka kuyuka shi uno muntu i mweni, wapelwe kakanda ka lwito, i biyampe kumwipangula shi ye musunsa wandi umbajinji kwiya kupwila netu, nansha shi uyukile’ko muntu kampanda mu kipwilo. Padi ukokeja ku mwita aye mushikate nandi pamo ne kulonda nandi pamo mu Bible ne mu kitabo kyetu kya ñimbo. Shi mupwidila ku Njibo ya Bulopwe, ukokeja ne kujokoloka nandi bityetye pa lubanza. Shi kupwila kubapu, mulombole’mba ukokeja kulondolola ku bipangujo byandi. Shi kipwilo kyenu kifwaninwe kutamba bukidi mwanda wa kushila kipwilo kikwabo njibo, ukokeja kumulombola’mba: “Nadi nsaka kuyuka milangwe yobe pa ino mpangiko. I muswelo’ka otukokeja kwitana nobe monka?” Kwata’ko mpangiko ya kukemona nandi difuku dikwabo. Bakulumpe bakakwatakanya uno mukenga mwanda wa kukankamika basapudi kebakingilangapo baile ku Kivulukilo.
3. Mwanda waka kidi na mvubu kwiteakanya mwanda wa kutundaila bapya ku Kivulukilo?
3 Ku bapya bavule, uno i musunsa wabo umbajinji wa kutompa ku ino nsangaji, ndoe ne bumo budi mu paladisa ya ku mushipiditu idi’mo bantu ba Yehova. (Mit. 29:11; Is. 11:6-9; 65:13, 14) Le i kintu’ka kiyampe kyo kebakelwapo? I muswelo otwibatundaila na kyanga.