Bukamoni Bukatampe Bukapānwa
1. Kutentekela pa dishikulu, i bika bikwabo bikokeja kutulumuna beni bakatanwa ku Kivulukilo? Shintulula.
1 Kitatyi’ka? Kyolwa kikalongwa Kivulukilo. Tukalonga bukomo bwa kwita bantu baye batanwe’ko. Bintu bikatulumuna beni ke’nkapo byobya byobakevwana, mhm. Lolo umo pa kupwa kutanwa ku Kivulukilo, wanene pangala pa byaamwene amba—muntu ne muntu wadi bya bulunda, njibo yadi mikundule bya dyangi kadi milongololwe na bengidi ba kwisakila. Nanshi, batwe bonso ke’nkapo muneni, tukalunga’ko kuboko na kupāna bukamoni mu uno mukenga wa mvubu mpata mu mwaka.—Ef. 4:16.
2. Le umo ne umo ubwanya namani kupāna bukamoni ku beni?
2 Imuna Beni na Nsangaji: Kwimuna beni bya bulunda ne mimungomungo ya nsangaji bikapāna bukamoni. (Yoa. 13:35) Nansha shi kubwanyapo kwisamba na bantu bonso, ukokeja kulombola na nsangaji boba bodi nabo pabwipi dyobe dijina. (Bah. 13:1, 2) Jingulula beni bamweka bu kebeyukilepo na muntu nansha umo. Padi bapelwe’tu kakanda ka lwito kitatyi kya kampanye. Ubwanya kwibepangula amba, “Le uno o musunsa obe mubajinji kwiya kuno?” Wibanene bashikate nobe pamo, kadi londolola ku kipangujo kyo-kyonso kyobadi nakyo. Shi kipwilo kyenu kisa kutaluka bukidibukidi mwanda wa kushila kipwilo kikwabo njibo, ukokeja kunena’mba: “Nadi nkimba kuyuka mowamwena ino mpangiko. Le tubwanya kwimona monka namani?”
3. I muswelo’ka otukatundaila boba kebakingilanga?
3 Tundaila Boba Kebakingilanga: Ne kutatana kwine mpika, ku Kivulukilo kukatanwa ne basapudi kebakingilanga, kubadila’mo ne boba bayanga enka ku Kivulukilo mwaka ne mwaka. Wibatundaile, ne kwibalombola’mba ubasangala kwimona nabo. (Loma 15:7) Bakulumpe bakokeja kwenda ku mobo a bano banabetu kinondanonda na kupwa kwa Kivulukilo ne kwibakankamika bendelele kupwila pamo na kipwilo. Tulomba’mba bavule bakatanwa’ko bakakunkwe mityima kutendela Leza, ke enkapo pa mwanda wa byobakevwana ino i ne pa mwanda wa byobakamona bu ‘mingilo yetu milumbuluke yo bamona.’—1 Pet. 2:12.