Kifundwa kya Bible kya Kasuku ne kya Kisaka Kidi na Mvubu!
1. I muswelo witutele bininge Kitango Kyendeji mutyima mu kino kitatyi, ne mwanda waka?
1 Monka mobyādi bikadile mu myaka katwa kabajinji, Kitango Kyendeji kitanga mutyima bininge ku ngikadilo ya bantu ba Yehova. (Bil. 15:6, 28) Byafwena makumbi afita a kyamalwa kibūke, i biyampe musapudi yense wa Bulopwe apwane kipwano kya mpwaninine na Yehova. Lelo i muswelo’ka omukengidija kitatyi kyomwadi mupityijanga ku Kifundwa kya Kitabo kya pa Kipwilo? Twi bakankamikwe batwe bonso kwingidija kino kitatyi ku butōtyi bwa kisaka. Kwingidija senene kino kitatyi kuketukwasha tukole bininge mu Kinenwa kya Leza kya ku bukomo bwa mushipiditu ne kuteka mema a būmi adi’mo.—Mit. 1:1-3; Loma 11:33, 34.
2. Lelo i muswelo’ka otukateakanya butōtyi bwetu bwa mu kisaka?
2 Butōtyi bwa Kisaka bwa Kyolwa: Mitwe ya bisaka i mikankamikwe kusela biselwa byayo kumeso a Yehova ne kutadija shi kifundwa kya Bible kya kisaka kimwenwa’mo kamweno kiloñwanga kitatyi ne kitatyi. (Kup. 6:6, 7) Bankungulume ne bankungakaji bakubulwa biselwa bya bisaka bakengidija kino kitatyi mwanda wa kulonga kifundwa kya Bible kya kasuku ne bukimbi. I biyampe batwe bonso twikale ‘kukūla kitatyi’ kya kwifunda ne kulanguluka mwanda wa kulama bukomo bwa ku mushipiditu bwa kwitukwasha mu ano ‘mafuku mabimabi.’—Ef. 5:15, 16.
3, 4. Lelo i bika byotwalombolwa kwingidija mu kifundwa, ne i bika byotufwaninwe kuta’ko mutyima?
3 Bine bya Kwifunda: Dibuku Index des publications de la Société Watch Tower nansha dishike dya Watchtower Library bikokeja kwimukwasha mutane myanda isangaja pomwifunda Bible. Bisaka bikokeja kubandaula bishinte bya mu Kiteba kya Mulami bīyanga kitatyi ne kitatyi, kimfwa byobya binena’mba: “Mwa Kumwena Nsangaji mu Kisaka,” “Fundija Bobe Bana,” ne “Ku Betu Bana.” Kadi Réveillez-vous ! ikalanga na mitwe ya myanda inena’mba: “Les Jeunes s’interrogent,” ne bishinte bikunka mutyima bīsambila pa bulumbuluke bwa bupangi.
4 Kubulwa kutanga Bible bya lubilolubilo kubwanya kutweja misoñanya ya Leza ne bufundiji mu ñeni ne mu mityima ya bonso ba mu kisaka. (Bah. 4:12) Byaba bikwabo mukokeja kutala mavideo alupulwa na bulongolodi ne kwisambila’po. Kino kikakwasha kwikala na luku ne kuvuluka myanda. Mwene i kiyampe kwipangula ba mu kisaka byobya byobasangela?
5. Mwanda waka kifundwa kya Bible kya kasuku ne kya mu kisaka kidi na mvubu kutabuka pano?
5 Kyo Kikadile na Mvubu Pano: Kwikala bakomo ku mushipiditu kuketuteakanya mwa ‘kwimanina talala tumone bupandiji bwa Yehova.’ (Div. 14:13) Bambutwile basakilwa kuludikwa mwa kulelela bana “mubukata mwa lukongo luno lukondame, ne lwa kuvutakanya.” (Fid. 2:15) Bana bafwaninwe kukwashibwa bayuke mwa kukomenena ngikadilo myoneke idi ku masomo dyalelo. (Nk. 22:3, 6) Ba mulume ne mukaji bafwaninwe kuningija wabo “monji wa mpambo isatu” pamo na Yehova. (Mus. 4:12) Nanshi twingidijei senene kitatyi kyetushadila’ko na kwitamija batwe bene na bene mu ‘kwitabija kwetu kukola’!—Yude 20.