Fundija Boba Bakolelwa Kutanga
1. Lelo i makambakano’ka otukokeja kutana mu busapudi?
1 Potutambilanga mu busapudi, kyaba kimo tutananga makambakano pa kufundija bubinebine ku bantu bakolelwa kutanga biyampe. Le tukalonga’po namani?
2. Lelo i muswelo’ka otukalombola amba tulēmekele boba bakolelwa kutanga, ne mwanda waka twibalēmeke?
2 Wibalēmeke: Mwikadile mutyima wa muntu kyo kintu kidi na mvubu ku meso a Yehova, kemasomopo afundile, mhm. (1 Sam. 16:7; Nk. 21:2) Nanshi, ketwakatyepekai boba bakolelwa kutanga senene. Babwanya kwitabija bukwashi bwetu shi twibalēmeke ne kwibatūkijija mutyima. (1 Pet. 3:15) Padi kiketulomba tuleke kuningila muntu’wa kutanga kisonekwa nansha musango. Kitatyi kyendelela muntu mu kwifunda bubinebine bwa mvubu budi mu Bible, ubwanya kusaka kwifundila’ko kutanga mwanda wa kwimwena nsangaji ya kutanga Kinenwa kya Leza na diwi ditūke “dyuba ne bufuku.”—Mit. 1:2, 3.
3. Lelo i manwa’ka otukokeja kufundija nao boba bakolelwa kutanga biyampe?
3 Manwa a Mwa Kufundijija Bifundwa bya Bible: Bifwatulo bitukwashanga nakampata pa kufundija bantu nabo bebitentekele. Ubwanya kwipangula mwifundi byalanga pa kifwatulo kidi mu kitabo kyodi nakyo. Kupwa ipangula bipangujo bipotoloke bimukwasha evwanije bine bifundija kino kifwatulo. Ingidija bisonekwa bishintulula bufundiji bwa pa kifwatulo. Kadi bifwatulo bibwanya kwingidijibwa pa kupituluka kifundwa. Kokafundija myanda mingi kya pamo. Tyityija mutwe wa mwanda ne myanda mikatampe idi mu kifundwa, kadi epuka kutweja’mo myanda mikwabo. Tangididila bisonekwa mu Bible, kupwa ipangula bipangujo uyuke shi mwifundi wivwanije byatangwa. Kulonga namino kukokeja kumulundila’ko buya bwa kulumbulula mutangilo wandi amba amone kwa kukimbila’ko aye mwine bubinebine bukwabo mu Bible.
4. Lelo i muswelo’ka otukokeja kukwasha mwifundi wetu alumbulule mutangilo wandi?
4 Bingidilwa Bikwasha Kulumbulula Butangi: Bantu bakolelwa kutanga biyampe nansha boba bafundile’tu bityetye babwanya kwivwanija myanda ne kulama’yo senene. Wibakankamike bengidije mabande ne madishike alupwilwe a butangi bwa mabuku etu. Kuteja buno butangi na katentekeji koku ulonda mu kitabo, ne kupituluka bishima na diwi ditūke, kukakwasha muntu alumbulule mutangilo wandi. Kadi boloshile Wiibidije Kutanga ne Kulemba ukokeja kumukwasha. Kyaba kikwabo, bakulumpe bakokeja kuteakanya’ko kalasa ka kwifunda kutanga mu kipwilo. Ano madingi aketupēlejeja potukwasha boba bakomenwa kutanga bevwanije “bisonekwa bikola,” bidi na bukomo bwa kwibapa ñeni mwanda wa lupandilo.—2 Tem. 3:15.