Mwa Kukwashisha Boba Bakolelwa Kutanga

1. Lelo kufundija Bible ku bantu bakolelwa kutanga kudi na kikoleja’ ka?

¹ Bantu bakolelwa kutanga babwanya kusangela bintu bya ku mushipiditu, inoko babwanya kutuyulwa na Bible ne na mabuku makwabo. Kupa bantu badi namino dibuku Bifundija Bible mu kwitana kubajinji, kekubwanyapo’tu kulupula bipa biyampe. Le i muswelo’ka otukebakwasha ku mushipiditu? Twaipangwile biloñanga basapudi ba bwino ba mu matanda 20. Teja byobanenene kunshi’ku.

2. Le i bingidilwa’ka biyampe bya kukwasha nabyo muntu ukolelwa kutanga?

² Shi mwifundi utañanga’ko bityetye nansha shi kayukilepo kutanga, ubwanya kushilula nandi mu boloshile, Teja Leza nansha Teja Leza Amba Wikale Mūmi Nyeke. Tutu umo pania wa mu États-Unis ulombolanga muntu waetana nandi ano maboloshile onso abidi ne kumwipangula i wepi wamusangaja’po bininge. Bilo ya musambo ya mu Kenya ilombola’mba, bino bingidilwa byalupwile bipa biyampe mu yabo ntanda mwanda mu Afrika bantu bafundijibwanga kupityila ku nsekununi pa kyaba kya mīsambo ya bipangujo ne malondololo. Nansha muntu mufunde byabwanya bukidibukidi bonka kwitabija kwifunda kwa kutanga ne kwipangulwa, inoko ano manwa abwanya kulengeja muntu ufundile bityebitye etyepelwe. Shi mwifundi uyukile kutanga nansha bityetye, basapudi bavule basakanga kushilula nandi na boloshile Myanda Miyampe Itamba Kudi Leza! nansha Ubwanya Kwikala Mulunda na Leza!, nansha padi na Dibuku Dyami dya Mānga ya mu Bible.

3. Lelo i madingi’ka aketukwasha tufundije senene boba kebayukile kutanga?

³ Fwija’ko: Boba kebayukile kutanga bakwatwanga bumvu, kadi bavule betyepelwanga. Kwibakwasha beivwane bu badi na mvubu i ditabula dibajinji ditupa mukenga wa kwibafundija bubinebine. Bantu bavule kebayukile kutanga bekalanga na ñeni ne kukwata myanda. Wibalēmeke ne kwibapa bulēmantu. (1 Pe. 3:15) Bakekala na mutyima wa kwifunda shi bamona amba bukomo bobalonga i bwa kamweno ne amba bendelelanga ku mushipiditu. O mwanda wibafwije’ko na nsangaji.

4. Lelo i muswelo’ka otukakankamika boba batanga’ko bityetye bateakanye kifundwa?

⁴ Shi mwifundi utañanga’ko bityetye, mukankamike ekale uteakanya kifundwa. Basapudi bamo ba mu Afrika wa Kunshi bakankamikanga bobefundanga nabo balombe muntu wa mu kisaka nansha mulunda utañanga biyampe ebakwashe. Musapudi umo wa mu Alemanye wapele bantu bobefundanga nabo mutyima wa kuteakanya na kwibapa kyandi kitabo kitatyi kyobefunda misango mityetye, mwanda wa bamone mokipēlele kutana malondololo shi bashika popa padi malondololo. Tutu umo wa mu India wakankamikile bantu bobefundanga nabo batale bifwatulo bya mu kifundwa kya yenga wiya’ko ne kulangulukila’po kumeso kwa kitatyi.

5. Le i muswelo’ka otukalombola kitūkijetyima potwendeja kifundwa?

⁵ Ikala na Kitukijetyima: Nansha shi wingidijanga dibuku’ka, imanina pa myanda mikatampe ne kukwasha mwifundi eivwane biyampe. Ku ngalwilo, i biyampe kwisamba nandi mu minite 10 kutūla ku 15. Kokesamba myanda mipite bungi, mubwanya kwifunda misango mityetye’tu mu kifundwa ne kifundwa. Shi mwifundi utanga bityetye, mutūkijije mutyima. Padi kakabulwepo kulumbulula butangi bwandi kitatyi kyatamija buswe bwa kuswa Yehova. Pa kukwasha mwifundi alonge namino, i biyampe kumwita atanwe ku kupwila’nka mukishilulashilula.

6. Le tubwanya kukwasha bantu namani bayuke kutanga?

⁶ Shi befundi ba Bible befunda kutanga, bakendelela bukidibukidi ku mushipiditu. (Ñim. 1:1-3) Bavule bakwashanga bobefunda nabo na kwingidija boloshile Wiibidije Kutanga ne Kulemba mu minite mityetye ku mfulo kwa kifundwa ne kifundwa. Shi mwifundi watyumukwa mutyima, padi ubwanya kumukankamika na kumulombola patōka bintu bimobimo bya wadi watange biyampe. Mukulupije amba Yehova usa kumwesela, kadi mukankamike alombe Leza amukwashe. (Nki. 16:3; 1 Yo. 5:14, 15) Basapudi bamo ba mu Alemanye bakankamikanga bobefundanga nabo betungile bitungo bifwaninwe bya kulonga kitatyi kyonso—kimfwa, kuyuka bidi alufabe, kupwa kutana bisonekwa kampanda ne kwibitanga, ku mfulo, kutanga mabuku esambila pa Bible ashintulwilwe mu muneneno upēla. Divule, kukwasha bantu bayuke kutanga kulomba ne kwibakankamika bekale na mutyima wa kutanga, ke enkapo kwibafundija mwa kutangila kete, mhm.

7. Mwanda waka ketufwaninwepo kwikaka kufundija bubinebine ku boba bakolelwa kutanga?

⁷ Yehova kapelulangapo bantu bafunde bityetye. (Yoba 34:19) Inoko aye usaatanga bidi mu mutyima wa muntu. (1 Bi. 28:9) Pa kino kokikaka kufundija bubinebine ku boba bakolelwa kutanga. Udi na bingidilwa biyampe bivule byobwanya kushilula nabyo. Mafuku pa kupita’po, ubwanya kutundulwila kifundwa mu dibuku Bifundija Bible ne kumukwasha evwanije biyampe Bisonekwa.