Muswelo wa Kuteakanya Kupwila kwa Mingilo
1. Lelo Kupwila kwa Mingilo kudi na kitungo’ka, ne i muswelo’ka otukokeja kumwena’mo senene?
1 Kupwila kwa Mingilo kwituteakanyanga twingile mwingilo ulupula bipa. Kitungo kyako kine i kya kwitukwasha tusapule myanda miyampe ya Bulopwe, tulonge bana ba bwanga, ne kusapula kufwena kwafwena butyibi bwa Leza. (Mat. 28:20; Mako 13:10; 2 Pet. 3:7) Tumwenanga ne pa mfulo mu kuno kupwila kwa mvubu kitatyi kyotwilongolola ne kulondolola’ko.
2. I muswelo’ka otuketeakanya mwa kwivwanina dishikulu?
2 Dishikulu: Pavule myanda ya kwingidija mu dishikulu ilombolwanga mu bulombodi bupebwa muneni. Tala kipindi kipēnwe, kubadila’mo ne bisonekwa bitelelwe, langulukila pa muswelo okokeja kwingidija myanda’ya mu mwingilo obe.
3. I muswelo’ka otukalongolola mwisambo wa bipangujo ne malondololo?
3 Mwisambo wa Bipangujo ne Malondololo: Kino kipindi kikapityijibwa pamo bwa Kifundwa kya Kiteba kya Mulami, na ntwelelo ne mvuyo mīpi. Shika myanda mikatampe mu musango ne musango, kadi wilongolole mwa kuletela’ko bilondololwa bīpi inoko bimvwanike.
4. Le tukalongolola namani kipindi kya mīsambo ne bemvwaniki?
4 Mīsambo na Bemvwaniki: Kino kipindi kikapityijibwa bwa dishikulu, Inoko muneni ukepangula mwanda wa bemvwaniki bamobamo banene’po. Shi ubashika myanda mikatampe ne kutanga bisonekwa bidi’mo, ukabwanya kulondolola kitatyi kipangulwa bipangujo. Tutu upityija kino kipindi ukalonga bukomo bwa kukoka bemvwaniki banene’po pabandaulwa myanda mikatampe.
5. Lelo i bika biketukwasha tumwene binebine mu bya kumwena’ko?
5 Bya Kumwena’ko: Mu bipindi bimo mukekala ne bya kumwena’ko bya myanda ilongeka bikalombola muswelo wa kwingidija mu mwaba myanda yanenwa. Bakulumpe nansha basapudi ba bwino nansha bapania bakatūlwa mu bya kumwena’mo. Powilongolola kino kipindi, ubwanya kulanga ne muswelo obikapityijibwa. Palongwa kya kumwena’ko kya musapwilo upēla, langulukila pa muswelo obwanya kwingidija’o abe mwine mungya bantu palapala bowisamba nabo. Tá mutyima wa kupaika bitabo nansha mapepala akengidijibwa mu kya kumwena’ko. Mu Butōtyi bwa Kisaka bwa kyolwa, mukokeja kupituluka mu bya kumwena’ko bimo.
6. Lelo i bubinga’ka bumobumo botufwaninwe kuteakenya Kupwila kwa Mingilo?
6 Kupwila kwa Mingilo kukaloa shi twi beteakanye ne shi tulangulukila pa muswelo usa kupityijibwa bufundiji bwa kamweno. Shi tulonge namino, tukekankamika bininge. (Loma 1:11, 12) Shi twitūdile’ko kitatyi kya kuteakanya Kupwila kwa Mingilo, nabya tukekala bakumbanye mwa kuvuijija mwingilo otulobekelwe. —2 Tem. 3:17.