Bulombodi ku Bapityija Bipindi ku Kupwila kwa Mingilo
Kushilwila pa Mwingilo Wetu wa Bulopwe wa uno kweji, bishima bya ku mpangiko ya Kupwila kwa Mingilo bibaipipijibwa. Bulombodi ne bivulujo bilonda’ko bikapingakena ne kushintulula byobya binenenwe mu kishinte “Muswelo wa Kuteakanya Kupwila kwa Mingilo,” kya mu Mwingilo Wetu wa Bulopwe wa Kweji 5, 2009.
◼ Dishikulu: I buneni bwimanine pa myanda mitongwe kwampikwa bemvwaniki kulondolola’mo. Muneni ukemanina pa bintu bikakwasha nakampata kipwilo.
◼ Bipangujo ne Malondololo: Kiifwene na Kifundwa kya Kiteba kya Mulami, kino kipindi kidi na ntwelelo ne mvuyo mīpi, kadi mwipangulwanga bipangujo bya misango yonso. Mwendeji ukatyina kunena bilabila. Bisonekwa bya lutwe bibwanya kutangwa mungya kitatyi. Misango keikatangwepo poso shi bulombodi bunena kutanga’yo.
◼ Mwisambo: I dishikulu mulondolola ne bemvwaniki. Ke dishikulupo dyonka, kadi ke enkapo bipangujo ne malondololo.
◼ Bya Kumwena’ko ne Bwipangudi: Bulombodi bwa kya kumwena’ko bunena’mba tutu upelwe kipindi ye udi na kiselwa kya kulongeja kya kumwena’ko; kafwaninwepo kulonga’kyo aye mwine. Boba batonga kumukwasha bafwaninwe kwikala ba bwino kadi baleta kimfwa, kadi shi bikokejika ukeivwanika nabo kumeso kwa kitatyi. Ke biyampepo kwingidija bapya ne basapudi bampikwa bwino balonge kya kumwena’ko kya mwa kusapwila mwanda’tu wa kwibapa mukenga wa kupita ku lukala, nansha bamo byobabwanya kwingidijibwa bu bene njibo. Basapudi balonga bya kumwena’ko bakata’ko mutyima wa kutala kudi bemvwaniki. Boba bengidijibwa ku bwipangudi bafwaninwe kulondolwela ku lukala pa kyaba kya pobashikete. I biyampe kupituluka mu bya kumwena’ko ne bwipangudi. Shi kitatyi kya kupwila kibapite ne kebilombe tutu epipije kipindi kyandi, kafwaninwepo kutalula bya kumwena’ko nansha bwipangudi. Kumeso kwa kutonga ba kulonga bya kumwena’ko ne bwipangudi, bengidi ba mingilo bakepangula mukwatakani wa kitango kya bakulumpe nansha mukulumpe mukwabo.
Shi kipindi kampanda kidi na bulombodi bwa pa bula, bufwaninwe kulondwa na katentekeji. Shi bipindi bya ku Kupwila kwa Mingilo bipityijibwa munenenwe kūlu’ku, batutu bakakwasha’mba Kupwila kwa Mingilo ‘kulongibwe monka mo byendele biyampe ne mo bikadile.’—1 Kod. 14:40.